رووداو دیجیتاڵ
بارسێلۆنا گورزێکی دیکەی بەرکەوت و ئاندرێس کریستینسنی بەرگریکارە دانیمارکییەکەی لە یارییەکەی بەرامبەر سێڤییا تووشی پێکان بوو، کاتێک لە خولەکی 58 بەهۆی پێکدادان لەگەڵ هێرشبەری یانەی ئەندەلووسی، رۆبێرت ناڤارۆ، ناچاربوو یاریگای بەجێبهێڵێت.
لە یارییەکی بەهێزدا، لە گەڕی حەوتەمی لالیگاد، یانەی بارسێلۆنا لەنێو یاریگای رامۆن سانچێز پیزخواندا بووە میوانی سێڤییا و دوای پێشکەشکردنی ئاستێکی بەرز توانی 3-1 لە یانەی خاوەن یاریگا بباتەوە، بەڵام یاریزانێکی لەدەستدا.
دوای پێکدادانەکە، کریستینسن ئاماژەی بە چاودێری پزیشکی کرد؛ دواتر بڕیاردرا بگۆڕدرێت، چونکە نەیتوانی بەردەوام بێت لە یارییەکە.
بەرگریکارەکە بەشێوەیەکی دیار بەناڕەحەتی یاریگای بەجێهێشت و لەسەر کورسیی یەدەگ کورسییەکەی گرت و نیشانەکانی بێزاری و دڵتەنگی روونی هەبوو.
بڕیارە لە چەند کاژێری داهاتوودا کریستینسن پشکنینی پزیشکی بۆ بکرێت بۆ دیاریکردنی سروشت و قەبارەی پێکانەکەی، چونکە تاوەکو ئێستا دەستنیشانکردنی کۆتایی پێکانەکەی رانەگەیێندراوە.
پێکانەکەی لە کاتێکی سەختدایە بۆ بەرگریکارە دانیمارکییەکە، کە لە وەرزەکانی رابردوودا بەهۆی پێکانەوە بەرگەی دوورکەوتنەوە بۆ ماوەیەکی درێژی لە یاریگاکان گرتووە.
لە وەرزی 2025-2026دا، بەهۆی دڕانی بەستەرە خاچدارەکەیەوە، 32 یاری لەگەڵ بارسێلۆنا و هەڵبژاردەکەیدا بەشداری نەکرد، ئەمە جگە لە سێ یاریی دیکە، کە بەهۆی کێشەی ئازار لە قاچەکانیدا بوو.
هەروەها کریستینسن لە وەرزی 2024-2025 بەهۆی پێکان لە ماسوولکەکانی دوورکەوتەوە، ئەمەش وایکردووە نەبوونی بەردەوامی یەکێک بێت لەو ئاستەنگە سەرەکیانەی کە لە ماوەی یاریکردنی لە بارسێلۆنا رووبەڕووی بووەتەوە.
ئەم بەرگریکارە لەم وەرزەدا رۆڵێکی گرنگی لە پێکهاتەکەدا مسۆگەر کردبوو، لەکۆی هەشت یاریی تیپەکەدا لە حەوت یاریدا بەشداریکردبوو، کە شەش یاریی لە لالیگا و یەک یاریش لە چامپیۆنزلیگ و لە چوار یارییدا بەسەرەکی دەستیپێکردبوو.
هاندەرانی بارسێلۆنا چاوەڕێی ئەنجامی پشکنینە پزیشکییەکان دەکەن بۆ دیاریکردنی قەبارەی پێکانە نوێیەکە، بەتایبەتی بە لەبەرچاوگرتنی ئەوەی کە کریستینسن پێش گۆڕانکارییەکەی بەرامبەر سێڤییا ئاستێکی بەرزی پێشکەشکردبوو.
