.jpg&w=3840&q=75)
رووداو دیجیتاڵ
دەزگەی ئاسایشی نیشتمانیی عێراق دەڵێت، لەئۆپەراسیۆنی (سێبەری دادوەری) هەزار و 568 فەرمانی دەستگیرکردن لەبەغدا و سەرجەم پارێزگاکان جێبەجێ کراون.
ئەرشەد حاکم، گوتەبێژی دەزگەی ئاسایشی نیشتمانیی عێراق، رۆژی هەینی، 25ـی ئەیلوولی 2026، بەتۆڕی میدیایی رووداوی راگەیاند: "ئەم ئۆپەراسیۆنە پشتی بەستووە بەهەوڵێکی هەواڵگریی فراوان بۆ گەیشتن بەو کەسانەی لەلایەن دادگەوە داواکراون، هەزار و 568 تۆمەتبار دەستگیرکراون."
تۆمەتبارەکان بەسەر چەندین تاوانی جیاواز دا دابەشبوون:
54 تۆمەتبار بەدۆسیەی تیرۆر
194 تۆمەتبار بەدۆسیەی ماددەی هۆشبەر
553 تۆمەتبار بەدۆسیەی هەڕەشە و گێچەڵ
195 تۆمەتبار بەدۆسیەی فێڵکردن و هەڵخەڵەتاندن
54 تۆمەتبار بەهۆی بانگەشەکردن بۆ حزبی بەعسی قەدەخەکراو
بەگوێرەی دەزگەی ئاسایشی نیشتمانیی عێراق، ئۆپەراسیۆنی (سێبەری دادوەری) بەسەرپەرشتی و بەدواداچوونی سەرۆکی دەزگەکە و بەهاوئاهەنگی لەگەڵ دادوەرانی پسپۆڕ ئەنجامدراوە. رێکارەکان لەرێگەی دیاریکردنی شوێنی داواکراوان و چاودێریکردنی جووڵەکانیان و جێبەجێکردنی فەرمانی دادگە بووە بەپێی یاسا.
گوتەبێژی دەزگەی ئاسایشی نیشتمانیی عێراق راشیگەیاند: "سەرباری بەدیهاتنی ئامانجەکانی ئەم ئۆپەراسیۆنە، بەڵام راوەدوونانی داواکراوان بەردەوام دەبێت و جێبەجێکردنی فەرمانی دەستگیرکردن وەک ئەرکی سەرەکیی دەزگاکە دەمێنێتەوە تاوەکو هەموو تۆمەتباران رادەستی دادگە دەکرێن."
