رووداو دیجیتاڵ
عێراق و تورکیا لەبارەی سەربازگەی باشیک (زێلکان) گفتوگۆیان کردووە. جێگری پارێزگاری نەینەوا دەڵێت: "رادەستکردنی سەربازگەکە بە حکومەتی فیدراڵی بە هێزەکانی نێو شنگالەوە گرێ دراوە."
غەزوان داودی، جێگری پارێزگاری نەینەوا، رۆژی شەممە (26ی ئەیلوولی 2026)، بە تۆڕی میدیایی رووداوی راگەیاند: "رێککەوتنی تایبەت بە رادەستکردنی ئەو سەربازگەیە لە پەراوێزی کۆبوونەوەکانی کۆمەڵەی گشتیی نەتەوە یەکگرتووەکان لە نیویۆرک لە نێوان عەلی فالح زەیدی، سەرۆکوەزیرانی عێراق و رەجەب تەیب ئەردۆغان، سەرۆککۆماری تورکیا هاتووەتە ئاراوە."
جێگری پارێزگاری نەینەوا گوتی: "رادەستکردنی سەربازگەی باشیک - زێلکان بە لایەنی عێراقی بە چارەنووسی هێزەکانی یەکینەکانی بەرخودانی شنگال (یەبەشە) و یەکینەکانی ژنانی شنگال (یەژەشە)ەوە گرێ دراوە. تاوەکو ئەو هێزانە لەگەڵ هێزە ئەمنییەکانی عێراق تێکەڵ نەکرێن، سەربازگەکە رادەست ناکرێ."
بەپێی راگەیێندراوە هاوبەشەکەی عێراق و تورکیا رۆژی چوارشەممە(23ـی ئەیلوولی2026)، رادەستکردنەوەی سەربازگەکە هاوکات دەبێت لەگەڵ ئەو پێشکەوتنانەی عێراق لە هەنگاوە ئەمنییەکانیدا بەدەستی هێناوە.
پرۆسەکە بە شێوەیەکی پلەبەندی و بەپێی خشتەیەکی زەمەنیی رێککەوتوولەسەر ئەنجام دەدرێ.
سەربازگەی باشیک (زێلکان) دەکەوێتە باکووری شاری موسڵ لە پارێزگای نەینەوا و لە ساڵی 2015ەوە هێزەکانی تورکیای تێدا نیشتەجێن.
سەربازگەی باشیک لە کاتی شەڕی داعشدا وەک بنکەیەکی راهێنان بۆ هێزەکانی پارێزگای نەینەوا (وەک هێزەکانی حەشدی نیشتمانی) بەکار‌هات.
