رووداو دیجیتاڵ
شاندێکی وەزارەتی شەهیدان بۆ گواستنەوەی دۆسیەی زیندانییانی سیاسی بۆ سەر دەزگای زیندانییانی سیاسیی عێراق سەردانی بەغدا دەکات.
رۆژی شەممە، 26ـی ئەیلوولی 2026، ئەحمەد مام رەسووڵ، بەڕێوەبەری گشتیی خزمەتگوزاریی کاروباری زیندانییانی سیاسی لەوەزارەتی کاروباری شەهیدان و ئەنفالکراوان بەتۆڕی میدیایی رووداوی راگەیاند: "ئێوارەی ئەمڕۆ شاندێکی باڵای وەزارەتی شەهیدان و ئەنفالکراوانی هەرێمی کوردستان سەردانی بەغدا دەکات و زنجیرەیەک کۆبوونەوە دەکات."
سەبارەت بەئامانجی سەردانەکە ئەحمەد مام رەسووڵ گوتی: "ئامانجەکە گواستنەوەی دۆسیەی زیندانییانی سیاسیی هەرێمی کوردستانە بۆ سەر دەزگای زیندانییانی سیاسیی عێراق، ئەمەش بەمەبەستی هاوتاکردنی مووچەکانیان."
بەگوێرەی ئەو زانیارییانەی دەست رووداو کەوتوون، شاندەکە بەسەرۆکایەتیی عەبدوڵڵای حاجی مەحموود، وەزیری شەهیدان و ئەنفالکراوانی هەرێمی کوردستان دەبێت.
بڕیارە شاندەکە لەگەڵ وەزارەتی دارایی عێراق و دەستەی شەهیدان و زیندانییانی سیاسیی عێراق کۆببێتەوە.
ئامانجێکی دیکەی شاندەکە هاوتاکردنی مووچەی کەسوکاری شەهیدان و ئەنفالکراوانە لەگەڵ مووچەی کەسوکاری شەهیدان لەعێراق.
مووچەی زیندانییانی سیاسی لەهەرێمی کوردستان 500 هەزار دینارە، بەڵام ئەگەر دۆسیەکانیان بچێتە سەر بەغدا، مووچەیان دەبێتە ملیۆنێک و 200 هەزار دینار و سەرجەم ئەو ماف و ئیمتیازاتانە دەیانگرێتەوە کە زیندانییانی سیاسیی عێراق هەیانە.
