رووداو دیجیتاڵ
بەرپرسانی كۆمەڵەی میوانخانە و چێشتخانەكانی كوردستان لە سلێمانی و هەولێر رەتی دەكەنەوە هیچ خواردنگەیەك لە ئەنجامی کەمبوونەوەی گازی شل داخرابێت یان خواردنەكەی گران كردبێت، بەڵام دەڵێن: لە هەولێر بازاڕی خواردنگەکان کز بوون.
مەحموود تۆفیق، سەرۆكی لقی سلێمانی كۆمەڵەی میوانخانە و چێشتخانەكانی كوردستان بە تۆڕی میدیایی رووداوی راگەیاند، هیچ چێشتخانە و شوێنێکی گەشتیاری بەهۆی گرانبوونی گازی شل دانەخراوە و نرخیش هیچ گۆڕانكارییەكی بەسەردا نەهاتووە.
مەحموود تۆفیق گوتیشی: "سەرقاڵی ئەوەین چوار بریکاری دابەشكردنی گاز تەنیا گاز بۆ چێشتخانەكان دابین بکەن و لە چەند رۆژی داهاتووشدا ئەوە یەكلایی دەكەینەوە، چونكە ناكرێت چێشتخانەیەك زیاتر لە 25 هەزار دینار بداتە بوتڵێك لەكاتێكدا نرخیش گران نەكات".
بەهۆی جەنگی ئێرانەوە، بەرهەمهێنانی گاز لە هەرێمی کوردستان کەمیکردووە و بەهۆیەوە نرخی بووتڵێک تاوەکو 35 هەزار دینار چووە. رۆژانە لە ناوچەکان خەڵکێکی زۆر نۆرە دەگرن بۆ وەرگرتنی گازی شل.
لەسەر هەمان پرس شوكر عەزیز، جێگری سەرۆكی لقی هەولێری كۆمەڵەی میوانخانە و چێشتخانەكانی كوردستان بە رووداوی گوت، لە هەولێریش نرخ بەرزنەبووەتەوە و هیچ چێشتخانەیەكیش بەو هۆیەوە دانەخراوە.
شوکر عەزیز دەڵێت، ئێستا بەشێوەیەكی گشتی و بەتایبەت ئەو خواردنگایانەی مۆڵەتی گەشتیارییان هەیە، کاریان 35% كەمی كردووە. راستە بەشێک لە پێداویستییەکان گران بوون، بەڵام نرخیشیان گران نەكردووە.
بەهۆی ئەو دۆخەی هەیە، ئەم ساڵ لەگەڵ ئەوەی کەشوهەوا خۆشە، بەڵام هاتنی گەشتیاران لە چاو ساڵانی رابردوو لەم وەرزەدا کەمیکردووە.
جەنگی ئەمریکا و ئیسرائیل لەگەڵ ئێران لە 28ی مانگی شوبات دەستی پێکرد کە کاریگەری لەسەر ناوچەکە و جیهان هەبووە. یەکێک لە کاریگەرییەکانی ئەوەیە کە نرخی بوتڵێك گازی ماڵان لە نزیکەی 8 هەزار و 500 دینارەوە بۆ سەروو 25هەزار دینار بەرزبووەتەوە.
