رووداو دیجیتاڵ
لە ڤیدیۆیەکدا ژمارەیەک قوتابی لە ئامادەیی (سەفیر) لە پارێزگای بەسرە دەردەکەون کە لە دوای تەواوبوونی تاقیکردنەوە کتێبەکانیان فڕێ دەدەن و بەسەریاندا دەڕۆن. وەزارەتی پەروەردەی عێراق لەسەر رووداوەکە هاتەدەنگ و بڕیاری دا رێوشوێنی تووند بگرێتە بەر.
رۆژی سێشەممە، 5ی ئایاری 2026، ئەحمەد ئەسەدی، وەزیری پەروەردەی عێراق بەوەکالەت بڕیاریدا بە گرتنەبەری رێکاری بەپەلە و تووند، لەگەڵ پێکهێنانی لیژنەیەکی لێکۆڵینەوەی تایبەتمەند بۆ بەدواداچوونی وردەکارییەکانی رووداوەکە و گرتنەبەری رێکاری یاسایی و پەروەردەیی بەرامبەر قوتابییەکان.
ئەم هەنگاوانەی وەزیری پەروەردە لە راگەیێندراوێکی وەزارەتەکەدا هاتووە: ''ئەم هەنگاوە بە مەبەستی رێکخستنی رەفتاری قوتابییەکانە بۆ رێگریکردن لە دووبارەبوونەوەی ئەو کارانەی کە گوزارشت لە رەوشتی قوتابی عێراقی و بەهاکانی دامەزراوەی پەروەردەیی ناکەن''.
ڤیدیۆکە لە تۆڕە کۆمەڵایەتییەکانی عێراق کاردانەوەی تووندی بە دوای خۆیدا هێناوە، بە تایبەتی بەهۆی سووکایەتیکردن بە پیرۆزییەکان و دڕاندنی کتێبی قوتابخانە.
ئەحمەد ئەسەدی دەڵێ: ''ئەمە وێنەی راستەقینەی قوتابیانی ئێمە نیشان نادات کە بە پابەندبوون و دیسپلین ناسراون و پێویستە کولتووری رێزگرتن لە سەرچاوە فێرکارییەکان بچەسپێنرێت''.
ئەسەدی داوای لە دایک و باوکی قوتابیان کردووە کە رۆڵی پەروەردەیی خۆیان بەهێزتر بکەن و بەشداربن لە راستکردنەوەی رەفتاری منداڵەکانیان و پابەندبن بە چاندنی بەها کۆمەڵایەتییە رەسەنەکان لەپێناو پاراستنی شکۆی دامەزراوەی فێرکاری.
