بەکارهێنانی ئایین و زاراوەی ئیسلامی بۆ پەردەپۆشکردنی تاوان و ستەم و کاری نامرۆڤانە بەتایبەت بەرامبەر هاووڵاتییانی نێو وڵاتی خۆت، پێش لە هەر لێکدانەوەیەک گەورەترین تاوانە بەرامبەر خودی ئیسلام دەکرێت، چونکە ئیسلام ئامرازی شەڕ و کوشتار و خوێنڕشتن نییە، بەڵکو ئایینی ئاشتی و مرۆڤدۆستی و ئاوەدانی و پێکەوەژیانە، ئایینێکە راشکاوانە دەستدرێژی بۆ سەر خوێن و ماڵ و کەرامەتی مرۆڤی قەدەخە کردووە، تەنانەت لەکاتی جیهادیش رێگەی نەداوە ئافرەت و منداڵ بکوژرێن و شار بەدەر بکرێن، یان سووکایەتیی بە کەزی کیژۆڵەیەک بکرێت و لەبەهای مرۆڤبوونی کەم بکرێتەوە.
ئەوەی وەزارەتی ئەوقافی سووریا بە ناوی دین کردی بەرامبەر بە هاووڵاتییانی کورد، هەمان ئەو ستەمە بوو سەدام بەناوی سورەتی ئەنفالەوە بەسەر گەلی کوردی موسڵمانی داهێنا و زیاتر لە 185 هەزار کەسی ئەنفال و کیمیاباران کرد، ئاخر بەکارهێنانی چەمکی ئایینی (فتوحات) کە لە سیاقی فەرموودە و قۆناخێکی دیاریکراودا بەکارهاتووە بۆ بێباوەڕ و دووڕووەکانی مەککە کە تا سەر ئێسقان دژی پێغەمبەر (درودی خوای لەسەر بێت) بوون، بە چ لۆژیکێک رەوایە بەرامبەر هاووڵاتییانی کوردی موسڵمان بەکار بهێندرێتەوە؟ ئەمە ناراستەوخۆ کافراندنی گەلی کورد و دوورخستنەوەی کوردە لە دین و حوکمدانێکی کوێرانە، ئەمە لە ئیسلامدا باجێکی قوڕسی هەیە، خۆیان دەڵێن شەڕەکە سیاسییە، ئەی چ عەجەب ئایین و مزگەوت و منارە و زاراوەی ئیسلامی وەکو ماکینەی گڕدانی ئاگری فیتنە بەکاردێنن و بۆیاخی کاری دڕندانەی خۆیانی پێ دەکەن؟ ئەمە لەڕووی ئەخلاقی و شەرعییەوە کارێکی ناڕەوایە، ئەمە لێدانە لە دین نەک دینداری بێت!
ناشیرینکردنی ئیسلام و تەکبیر و فتوحات و ئایەتی قورئانە لەژێر دروشمی دینداری ئایدۆلۆژی و مەسڵەحەتخوازی! ئیسلام ئەمانەتە بەر لەوەی 'تەبلیغ' بێت، ئەوانە چۆن لەخوا ناترسن وا غەدر لە ئیسلام دەکەن و ئەو ئەمانەتە گەورەیە لەبەر چاوی جیهان نابوت و ناشیرین دەکەن، ناحەقی نییە بڵێین بە نیسبەت ئەو بەناو موسڵمانانەی لەبەرگی داعشی و نمایشی ریشپۆشی بۆ گەوجاندنی خەڵک دین بۆ کارەسات و لێدان و ماڵوێرانی بەکار دێنن، کورد گەلێکی موسڵمانی عەیار بیست و چوارە.
خۆشبەختانە هۆشیاری کورد و دیندارانی کوردستان لە پاڵ هەموو هەوڵەکان هاتنە دەنگ و بەرپەچی ئەو شێواندن و فەتوا سەقەتەی ئەوقافی سوریایان دایەوە و دەنگدانەوەی گەورەی بە گوێی جیهانی ئیسلامی و بانگخوازە ئیسلامییەکان و ناوەندە ئایینیەکانی سوریا چرپاند، کە پەڵەیەکی رەشە بۆ دامەزراوەی ئایینی سووریا، ئاماژەیەکی نامۆشە بۆ وڵاتێک بانگەشەی موسڵمانیێتی بکات، چونکە ئەم هەنگاوە بە هەموو پێوەرێک پێچەوانەی ئایینی پیرۆزی ئیسلامە، ئەم دەنگدانەوەیە وایکرد دوای دوو رۆژ ئەوقافی سووریا بە بڕیارەکەی دابچێتەوە و بەیانێکی تر دەربکات و پاساو بۆ کارە قێزەونەکەی پێشتریان بێننەوە.
ئەوەی مەبەستمە لەم گوتارە ئەوەیە؛ با هەموو دووژمنانی کورد دڵنیابن لەوەی کورد هەرچییەکی بەسەر بێت! واز لە دۆزی رەوای خۆی ناهێنێت و دەسبەرداری شوناس و مافی خۆی نابێت، ئەوەی لە رۆژئاڤا روویدا هەستی هەموو کوردانی دونیای کۆکردەوە و ئازار و دەنگی کوردی بەهەموو جیهان گەیاند، ئێستا لە هەموو کات زیاتر کورد لەسەر پرسە نەتەوەییەکەی یەکهەڵوێست و پشتیوانی یەکدییە، ئەمە ئومێدێکی گەورە و پێشڤەچوونێکی تازەیە لە ئاراستەی هزری نەتەوەیی میللەتی کورد، بە هەموو جیاوازییەکانەوە لەسەر بەهاناوەچوونی هاواری کوردانی رۆژئاڤا، دلێرانە هاتنە مەیدان و هاودەنگ بوون.
گرنگە عاقڵانە هەنگاو بنێین و واز لە رق و کینە و ململانێی نێوخۆیی بێنین، چ ئەوانەی بەبیانووی هەستی دینداری رەخنە لە نادیندارێک دەگرن، یان ئەوانەی بە پاساوی نەتەوەیی لە ئایین دەدەن، بێ ئاگا لەوەی ئایین هانی بەرگری لە گەل و نیشتمان دەدات و هەستی نەتەوەپەروەری بە بەشێک لە دینداری دادەنێت، ئەرکی هەمووانە لەئاست پرسە نەتەوەیی و نیشتمانییەکان یەک هەڵوێست و یەک دەنگ بین و بە ئیرادەیەکی گشتییەوە لە ئاسۆ بڕوانین.
کورد وەک گەلێکی موسڵمان ئاشتیانە ئیسلامی وەرگرتووە و لەم چوارچێوەیەدا مرۆڤانەش بیر دەکاتەوە، بۆیە هیچ کات ئایینی پیرۆزی ئیسلامی بۆ لێدان و چەواشەکردن و ستەم و قەتلوعامی کەس بەکار نەهێناوە، ئەگەرچی بەناوی ئیسلامەوە ناهەقی گەورە بەرامبەر کورد کراوە، تەنانەت قەت خێر و خۆشی لە عەرەبی شۆڤێنی و تورک و فارس و رژێمە شیعی و سونییەکان نەبینیوە، وڵاتانی زلهێزی دیکەی دونیاش هەر لێگەڕێ، هەموویان بەرژەوەندی خۆیان بەلاوە گرنگە و بە(پرسی کورد)ـی ناگۆڕنەوە، کار گەیشتە سەر مافی نەتەوەی کوردیش، هەمووان دەبنەوە یەک و وەک دڕک لەپێی کورد رادەچن و رەحم بە کورد ناکەن.
بە کورتی تێگەیشتین چی دەگوزەرێ و چۆن دەگوزەرێ، بەڵام لەم قۆناخە ناتوانرێ کورد بە بێدەنگی کۆمەڵکوژ بکرێت، دەنگی کورد دەنگدانەوەی هەیە لە جیهان و کاردانەوە دروست دەکات، کەواتە سەردەم سەردەمی ئەوەیە "کوردانە" بیر بکەینەوە و خۆمان دۆستی خۆمان بین و یەکگرتن و تەبایی نێو ماڵی خۆمان بکەینە هەوێنی ئومێدی ئایندە و چیدیکە بە دروشمی بێ نێوەڕۆکی عەرەبی موسڵمان و بانگەشەی گەلانی دیموکراسیخواز نەخەڵەتێین.