کەرنەڤاڵە جەماوەرییە مەزنەکەی شاری بۆن لە وڵاتی ئەڵمانیا بەبۆنەی جەژنی نەتەوەیی نەورۆزەوە، تەنیا ئاهەنگێکی وەرزی و بۆنەیەکی ئاسایی نەبوو، بەڵکو نمایشێکی گەورەی هێزی نەرمی نەتەوەیەک بوو لە دڵی ئەورووپادا، ئەم گردبوونەوە یەکجار گەورەیە سەلماندی کە دیاسپۆرای کورد لە دەرەوەی وڵات، خاوەنی سەنگ و قورساییەکی جوگرافی و سیاسیی بێوێنەیە، ئەگەر بە دروستی ئاراستە بکرێت، دەتوانێت گەورەترین کاریگەری لەسەر هاوکێشە نێودەوڵەتییەکان و ناوەندەکانی بڕیار دروست بکات.
لەو کەرنەڤاڵەدا، کوردستانیان بە شەکاندنەوەی ئاڵای پیرۆزی کوردستان و پۆشینی جلی رەسەنی کوردییەوە، تابلۆیەکی یەکجار سەرنجڕاکێش و شارستانییان نەخشاند، بە تەواوی سەرنجی ئەڵمانیا و ئەورووپایان بۆ لای خۆیان راکێشا، ئەم دیمەنە پڕ لە رەنگ و ئاشتییە، وای کردووە ساڵانە میدیاکانی ئەڵمانیا و ئەورووپا بە گرنگییەوە رووماڵی ئاهەنگەکانی نەورۆز بکەن و پیرۆزبایی ئاراستەی کوردانی دیاسپۆرا بکەن، ئەمەش دەرخەری ئەو راستییەیە کە کولتووری دەوڵەمەندی ئێمە، باشترین پردی پەیوەندییە بۆ تێکەڵبوون لەگەڵ کۆمەڵگەی نێودەوڵەتی و راکێشانی سۆز و پشتگیریی گەلانی جیهان.
ئەوەی بەهایەکی ستراتیژیی زیاتری بەم وێستگە مێژووییە بەخشی، ئەو نەخشەڕێگا گشتگیرە بوو کە لە پەیامەکەی سەرۆک مەسعود بارزانی دا بۆ ئامادەبووان و تەواوی رەوەندی کوردستانی لە جیهان خرایەڕوو، ئەو پرەنسیپە جەوهەرییانەی بوونەتە پێویستیی قۆناخەکە و ئێمە هەمیشە وەک ئامانجی باڵا دەڕوانینە پیادەکردنیان، وەک: پاراستنی ناسنامە و زمانی نەتەوەیی لەناو نەوەکانی داهاتوودا، خۆڕێکخستنەوەی رەوەندی کوردی لەسەر بنەمای یەکڕیزیی نەتەوەیی، نواندنی رۆڵی باڵیۆزێکی شارستانی کە رێز لە بەهاکانی وڵاتانی میوانگر بگرێت، دروستکردنی لۆبییەکی یەکگرتوو بۆ داکۆکیکردن لە ئاشتی و مافە رەواکانی گەلەکەمان، رێک ئەو بابەتە هەستیارانە بوون کە جەنابی سەرۆک وەکو دیدگایەکی نەتەوەیی و سیاسیی قووڵ لە پەیامەکەیدا بۆ تاراوگەنشینان ورووژاندنی.
ئێمە سەرکەوتنی رێوڕەسمەکەی شاری بۆن و ئەو ئاراستە ستراتیژییانەی لە پەیامەکەی سەرۆک بارزانی دا هاتبوون، وەک بەردی بناخەی قۆناخێکی نوێی خەباتی دیپلۆماسی و رێکخراوەیی خۆمان لە دەرەوەی وڵات دەبینین.
لێرەوە بەوپەڕی بەرپرسیارێتییەوە دووپاتی دەکەینەوە، کە تەواوی هەوڵ و تواناکانمان دەخەینەگەڕ بۆ وەرگێڕانی دیدگا و پەیامەکەی سەرۆک بارزانی بۆ سەر واقیعی پراکتیکی و جێبەجێکردنیان بەبێ درێخی، ئەرکی لەپێشینەمان ئەوە دەبێت کە ئەو راسپاردانە بکەینە چوارچێوەیەکی کاری دامەزراوەیی، تاوەکو رەوەندی کوردستانی ببێتە دوانە و تەواوکەری هێزی ناوخۆیی کوردستان و لەم سەردەمەی جیهانگیریدا، کاریگەرترین رۆڵ لە پاراستنی دەستکەوتەکان و گەیاندنی دەنگی رەوای نەتەوەکەمان بە کۆمەڵگەی نێودەوڵەتی بگێڕێت.
لە کۆتاییدا، دەمەوێت سوپاسێکی گەرم و بێپایانی هەموو ئەو کوردە نیشتمانپەروەرانەی دیاسپۆرا بکەم کە بەو جۆش و خرۆشەوە ئامادەی ئەم ئاهەنگە نەتەوەییە بوون و بە شەکاندنەوەی ئاڵای پیرۆزی کوردستان، پەیامی زیندوویی نەتەوەکەمانیان بە جیهان گەیاند.
هەروەها، جێی خۆیەتی دەستخۆشی و سوپاسێکی تایبەت ئاراستەی هەموو ئەوانە بکەم کە شەونخونییان کرد و ئەرکی رێکخستن و بەڕێوەبردنی ئەم کەرنەڤاڵە مەزنەیان لەئەستۆ گرت، ئامادەبوونی ئێوە و ماندووبوونی رێکخەران، سەلماندی کە شادەماری کوردایەتی لە دەرەوەی وڵات چەندە بەهێزە و هێز و ورەیەکی گەورەتر بە هەموومان دەبەخشێت بۆ بەردەوامبوون.
هاوکات، جێی خۆیەتی سوپاس و پێزانینی تایبەتمان ئاراستەی دەزگاکانی راگەیاندن و میدیاکانی کوردستان بکەین، کە بە گرنگیپێدانێکی زۆرەوە رووماڵی ئاهەنگەکەی نەورۆزی شاری بۆنی ئەڵمانیایان کرد و پەیام و دەنگ و رەنگی ئەم هێزە گەورەیەی رەوەندی کوردستانیان بە ناوخۆی نیشتمان و تەواوی جیهان گەیاند.