رووداو دیجیتاڵ
لویس دی لا فوێنتێ، راهێنەری هەڵبژاردەی ئیسپانیا دڵخۆشیی خۆی بەبردنەوەی تیپەکەی لە فەرەنسا و گەیشتن بە یاریی کۆتایی مۆندیال پێشاندا و لەبارەی ئینگلتەرا و ئەرجەنتینش وەڵامی رۆژنامەڤانان دەداتەوە.
لویس دی لا فوێنتێ دوای یارییەکە و بردنەوەیان لە فەرەنسا بە دوو گۆڵی بێبەرامبەر گوتی "بەراستی ئەمە سەرچاوەیەکی گەورەی شانازییە، ئەو راستییەی کە پاشاکەمان پەیوەندی پێوە کردین و بایەخێکی وەها نیشان دەدات و بەردەوامە لە پشتگیریکردنمان. ئێمە زۆر شانازی بەمەوە دەکەین، بێگومان ئێمە بەرپرسین لەو شادییەی کە خەڵک لە شەقامەکاندا هەستی پێدەکەن. ئەم نەوە سەرسوڕهێنەرەی یاریزانان، خاوەنی رەفتار و ئەقڵییەتێکی ناوازەن و نموونەی باڵان بۆ چەندین بەهای جیاواز. ئێمە وڵاتێکی یەکگرتووین بۆ ئامانجێکی هاوبەش، بۆیە با چێژ لەمە وەربگرین. یەک هەنگاوی دیکەمان ماوە، دوایین هەنگاو و سەختترینیان. بێگومان دەبێت پەرە بە خۆمان بدەین و هەوڵیش دەدەین ئەوە بکەین."
راهێنەری لارۆخا لەبارەی ئاستبەرزیی تیپەکەی لە یارییەکەدا دەڵێت "دەمانزانی کە دەبێت بەڕاستی ئازاری فەرەنسا بدەین، دەبوو بەراستی ئەو گوشارە بەرزە بدۆزینەوە و لە پشت ئەو یاریزانە سەرەتاییانەوە بین کە هەوڵیان دەدا گوشارمان بخەنە سەر، دەبوو لە پشتیان بین. ئێمە فەرەنسا زۆر باش دەناسین، بەڵام رێگەیەکیشمان هەبوو بۆ بەرپەرچدانەوەی ئەمە و یاریزانەکان بە تەواوی و بە بێ کەموکوڕی ئەمەیان جێبەجێ کرد. ئینجا لە ناو یاریگادا، بێ گوێدانە ئەوەی چییان پێ دەڵێیت، ئەگەر خۆیان توانای دۆزینەوەی ئەو بۆشاییانەیان نەبێت و تەنانەت دروستیان نەکەن و سوودیان لێ نەبینن، هەروەها بە لەبەرچاوگرتنی لێهاتوویی و کارە ناوازەکانیان، ئەوا رێنوێنییەکان بێسوود دەبن. بەڵام ئەم تیپە هەموو قۆناخەکانی یارییەکە بە بێ کەموکوڕی لێکدەداتەوە، بۆیە ئەوە گرنگترین شتە. وە یەک وردەکاری دیکە، کە پێموایە پێشتر ئاماژەم پێدا سەبارەت بەو پەیامە؛ روون بوو، ئەم تیپە زۆر پابەندە. ئێمە گوتمان و ئەمەش لە راستیدا بە بەڵگە کراوە، کە پەیامەکە ئەوە بوو: ئێمە رووبەڕووی یەکێک لە باشترین هەڵبژاردە نیشتمانییەکان دەبینەوە، بەڵام ئەوان باشترین تیپیان لەبەردەم دەبێت. کلیلەکەش لێرەدایە، ئێمە یەک تیپین. کاتێک رووبەڕووی تیپێکی وەک ئێمە دەبیتەوە، ئەوا ئێمە تێکنەشکێندراوین. ئێستاش هەمان هەستمان هەیە."
پرسیاری ئەوە لە دی لا فوێنتێ کرا، کە پێیخۆشە لە یاریی کۆتاییدا بەرامبەر کێ یاریی بکەن، ئەرجەنتین یان ئینگلتەرا؟ ئەو لە وەڵامدا گوتی "باوەڕم پێ بکەن، ئێستا ناتوانم یەکێکیان هەڵبژێرم. هەموویان تایبەتمەندی خۆیان هەیە. ئەرجەنتین و ئینگلتەرا وەک یەک نین کاتێک باسەکە دێتە سەر تۆپی پێ. تۆپی پێی ئەوروپی و تۆپی پێی ئەمریکای باشوور وەک یەک نین. بۆیە زۆر بەپەرۆشم بۆ رووبەڕووبوونەوەی ئەرجەنتین چونکە هاوڕێیەکی نزیکی لیۆنێل سکالۆنیم. بەڵام ئینگلتەراشم زۆر بەدڵە. پێموایە پێش مۆندیالیش گوتم کە ئەوان یەکێک بوون لە پاڵێوراوە گەورەکان. ئەوە یارییەکی رووبەڕووی یەکلاکەرەوە دەبێت لە نێوان دوو تیپی گەورەدا. بەڵام ئێمە بە باوەشی کراوە پێشوازیی لێدەکەین، هەر کامیان بێت."
