رووداو دیجیتاڵ
لیۆنێل مێسی، ئەستێرە و کاپتنی هەڵبژاردەی ئەرجەنتین پەیامێکی پڕ لە سۆز ئاراستەی دیێگۆ مارادۆنای ئەفسانەی کۆچکردووی ئەرجەنتین دەکات دوای سەرکردایەتیکردنی تانگۆ بۆ یاریی کۆتایی مۆندیال و دەڵێت "دەزانم خۆشی دەویستم".
لیۆنێل مێسی، ئەستێرەی ئەرجەنتین، دوای گەیشتن بە یاریی کۆتایی جامی جیهانی 2026، رێزێکی تایبەتی بۆ ئەفسانەی کۆچکردوو، دیێگۆ ئارماندۆ مارادۆنا دەربڕی.
دوای ئەوەی دوو ئەسیستی (تێپەڕاندنی یەکلاکەرەوە) پێشکەش کرد لە بردنەوەی ئەرجەنتین بەسەر ئینگلتەرا بەئەنجامی 2-1 لە پێش کۆتایی جامی جیهانیدا، مێسی جارێکی دیکە سڵاوی بۆ مارادۆنا نارد و ئەم سەرکەوتنە سەرنجڕاکێشەی پێشکەش بەو کرد.
مێسی بەپێی ماڵپەڕی فووت مێرکاتۆ گوتی "من دڵنیام دیێگۆ لە شوێنە بەرزەکەی خۆیەوە چێژ لەم ساتە وەردەگرێت.. ئەم سەرکەوتنە لەپێناو ئەودایە؛ هەمیشە رۆژێکی زۆر تایبەت بووە".
لیۆ لە درێژەی قسەکانیدا گوتی "من دڵخۆشم کە توانیم ئەم خۆشییەی پێ ببەخشم، و لە ناخی دڵمەوە ئومێدەوارم چێژ لەوە وەربگرێت".
مێسی هەروەها باسی لەو پەیوەندییە تایبەتە کرد کە لەگەڵ ئەفسانەی تۆپی پێی ئەرجەنتین کۆی دەکردنەوە و گوتی "ئێمە بەبەخت بووین کە لە سەردەمی دیێگۆدا ژیاین. نەمدەویست لێی جیا ببمەوە، دەشمزانی کە منی خۆش دەویست.. شانازی بە هەموو ئەو ساتە جوانانەوە دەکەم کە کۆیان کردینەوە".
ئەمە یەکەمجار نییە کە براوەی جامی جیهانی ستایشی مارادۆنا دەکات؛ چونکە پێشتریش سەرکەوتنی ئەرجەنتینی لە کۆپا ئەمریکای 2021 پێشکەش بە ئەو کردبوو.
