رووداو دیجیتاڵ
تۆپی فەرمیی مۆندیالی داهاتوو، خرایە ژێر زنجیرەیەک لە تاقیکردنەوەی زانستیی ورد، پاشئەوەی توێژەران و تایبەتمەندانی دینامیکیەتی هەوا، تۆپەکەیان تاقیکردەوە بۆ زانینی شێوازەکانی جووڵەکردنی تۆپە نوێیەکە لە نێو یاریگادا.
توێژەران هەروەها ویستیان لە کاریگەریی دیزاینی تۆپەکە، لەسەر شووت لێدان و پاسات لە کاتی یارییەکان، بکۆڵنەوە.
راپۆرتێکی ماڵپەری 'کۆنڤێرزەیشن' ئاشکرایکردووە، تۆپە نوێیەکە کە ناوی 'تریوندا'یە و کۆمپانیای ئەدیداس دروستیکردووە، تایبەتمەندیی ئەوەی هەیە کە یەکەمین تۆپی مۆندیالی پیاوانە لە تەنیا چوار پارچە پێکهاتووە، ئەوەش گەشەکردن و گۆڕانکارییەکی گەورەیە لە دیزاینی تۆپی پاڵەوانێتییەکان.
راپۆرتەکە هەروەها دەڵێ، ژمارەیەک لێکۆڵەری ژاپۆنی و ئینگلیزی، تاقیکردنەوەیان لەسەر تۆپەکە لە نێو تونێلی هەواییدا کردووە، بۆ پێوانەکردنی بەرگەگرتنی هەواو و کاریگەریی جووڵەی تۆپەکە، کاتێک بەخێرایی جیاواز لە تۆپەکە دەدرێت، ئەوەش بەئامانجی زانینی چۆنیەتی جووڵەکردنی لە کاتی یارییەکاندا.
توێژەران دەڵێن، دیزاینی 'تریوندا'، لەدوای ئاشکراکردنییەوە لە کۆتاییەکانی 2025، جێگەی سەرنج بووە، بەتایبەت بەهۆی کەمیی پارچەکانییەوە، هاوشێوەی ئەوەی کە تۆپی گابۆلانی دروستیکرد.
گابۆلانی ئەو تۆپە بەناوبانگەبوو کە لە مۆندیالی 2010ی ئەفریقای باشوور بەکارهێنرا و ئەوکات ژمارەیەک یاریزان و گۆڵپارێز، گلەییان لە تۆپەکە کرد، بەهۆی جووڵە لەناکاوەکانی لە هەوادا.
راپۆرتەکە دەڵێ، تۆپە نوێیەکە، پێناچێ هەمان تەنگژەی مۆندیالە ئەفریقییەکە دووبارە بکاتەوە، چونکە تاقیکردنەوەکان دەریان خستووە کە جووڵەکانی سەقامگیرترە لە گابۆلانی، بەتایبەت لە کاتی لێدانی راستەوخۆ و ئۆڤەر، بەراورد بە هەندێک لە تۆپەکانی پێشوو.
توێژەران دەڵێن، تۆپە نوێیەکە رووپۆشی دەرەوەی تایبەتی هەیە کە هاوکارە بۆ باشترکردنی جووڵەی لە هەوادا، ئەگەرچی بەراورد بە دیزاینی تۆپەکانی پێشوو، پارچەکانی کەمترە.
تاقیکردنەوەکان هەروەها دەریدەخەن تۆپە نوێیەکە، بەشێکی کەمی هێزەکەی بەهۆی دووریی لێدانەکانەوە لەدەستدەدات، ئەوەش بەهۆی زیاد بەرکەوتنی هەوا لە کاتی خێرایی زۆر بەرزدا.
ئەو جۆرە رووداوە، وادەکات هەندێک تۆپی زۆر بەهێز، کەمتر بگەنە ئامانجەکەیان، بەراورد بەو تۆپانەی لە مۆندیالەکانی پێشوودا بەکارهێنراون.
راپۆرتەکە دەڵێ، جیاوازییەکان گەورە نین، بەڵام ئەوەندەشە کە یاریزان لە کاتی یارییەکاندا هەستیان پێدەکرێت، بەتایبەت لە لێدانی بەهێز و پاساتی درێژ.
توێژەران گوتوویانە ئەو ئەنجامانەی پێیگەیشتوون، دوای ئەو تاقیکردنەوانە هاتن کە لەسەر تۆپەکان ئەنجامدران، لە کاتی لێدان بەبێ هەبوونی فڕۆکە لە ئاسمان. لە کاتێکدا تۆپەکە جووڵەی دەگۆڕێت لەکاتی یارییەکاندا، بەهۆی سووڕانەوەیان لە دوای شووت کردن. ئەمە جیا لە کاریگەریی شتی دیکە، وەک کەشوهەوا، شێ، پلەی گەرما و بەرزیی لە رووی دەریاوە.
راپۆرتەکە زیاتر گوتوویەتی، 'تریوندا'، هەروەها سیستمی تۆپی پەیوەستی تێدایە کە هاوکاریی ناوبژیوانانی ڤار دەکات، بۆ دەستنیشانکردنی ساتی دوایین لێدانی تۆپەکە و ئەوەش پشتگیریی بڕیارەکانی ئۆفسایدی ئالی لەکاتی پاڵەوانێتییەکان.
سیستمی چیپە ئەلیکترۆنییەکانی نێو تۆپەکان بەراورد بە مۆندیالی پێشوو گۆڕاون. لە تۆپە نوێیەکەدا یەکەی پێوانەی نێو یەکێک لە چوار پارچەکەی تۆپەکە، لەگەڵ زیادکردنی کێش بۆ پارچەکانی دیکەی ناو هەمان تۆپ.
توێژەران هەروەها دەڵێن، تاقیکردنەوەی راستەقینەی تۆپەکە لەگەڵ دەستپێکردنی یارییەکانی مۆندیالدا دەستپێدەکات، چونکە ئەوکات ئیدی بەرکەوتن و بەکارهێنان لەلایەن یاریزانان و گۆڵپارێزانی هەڵبژاردەکەوە، لەکاتی بەرکەوتنی راستەوخۆ و لە یارییە فەرمییەکان.