رووداو دیجیتاڵ
بارسێلۆنا چاودێری رۆدری، ئەستێرەی هێڵی ناوەندی مانچێستەر سیتی دەکات و دەیەوێت پێش ریال مەدرید بکەوێت بۆ بەدەستهێنانی تواناکانی ئەو یاریزانە ئیسپانییە.
بارسێلۆنا کار بۆ داڕشتنی تیپێکی بەهێز دەکات بۆ وەرزی 2026-2027. دوای ئەو ئاستە بەرزەی تیپەکە لەژێر سەرپەرشتی هانزی فلیک پێشکێشی کردووە، دیکۆ بەڕێوبەری وەرزشی یانەکە و یاریدەدەرانی دەیانەوێت پڕۆژە وەرزشییەکەیان بە یاریزانی ئاستبەرز بەهێزتر بکەن. هەرچەندە هێڵی پێشەوە و گواستنەوەی هێرشبەرێکی سەرەکی لە کارە لەپێشینەکانە، بەڵام یانەکە دەرگای بۆ بژاردەکانی دیکەش دانەخستووە.
میدیای ئیسپانیا ئاشکرایان کردووە بارسێلۆنا پرسیاری دۆخی رۆدری لە یانەی مانچێستەر سیتی کردووە. هەرچەندە ریال مەدرید بە بەربژێری سەرەکی بۆ گواستنەوەی ئەو یاریزانە دادەنرێت، بەڵام بەرپرسانی یانە کەتەلۆنییەکە بە وردی چاودێری دانوستانەکان دەکەن. دیکۆ و فلیک بڕوایان وایە رۆدری یەکێکە لە باشترین یاریزانانی جیهان لە پێگەی خۆیدا و شایستەی ئەوەیە هەوڵێکی دارایی گەورەی بۆ بکەن، بە مەرجێک یاریزانەکە خۆی ئارەزووی گواستنەوەی بۆ کامپ نو هەبێت.
راهێنەر و بەڕێوبەری وەرزشی یانەکە پێیان وایە بژاردەکانی هێڵی ناوەند تەواون، بەڵام پێکانەکەی فرێنکی دێ یۆنگ و ئەو گومانانەی لەسەر داهاتووی دروستبوون، وایکردووە بیر لە بژاردەی نوێ بکرێتەوە. لە ناوخۆی یانەکە بڕوابوونێکی زۆر هەیە بارسێلۆنا دەتوانێت ئەم گرێبەستە سەرکەوتووە ئەنجام بدات "یانەکە رۆدری وەک باشترین یاریزانی جیهان لە پێگەکەیدا دەبینێت".
رۆدری کە رۆڵێکی سەرەکی لە سەرکەوتنەکانی مانچێستەر سیتی و بەدەستهێنانی نازناوەکان هەبووە، گرێبەستەکەی لەگەڵ یانە ئینگلیزییەکە تاوەکو هاوینی 2027 بەردەوامە. یانە کەتەلۆنییەکە دەیەوێت سوود لە هەر هەلێک وەربگرێت بۆ گەڕاندنەوەی ئەو یاریزانە بۆ لالیگا، ئەمەش وەک هەڕەشەیەکی روون بۆ سەر پلانەکانی ریال مەدرید دادەنرێت.
