رووداو دیجیتاڵ
یانەی ریال مەدرید لە یەکەم دەرکەوتنی فەرمی خۆیدا لەژێر سەرپەرشتی جۆزێ مۆرینیۆ لە لالیگا، توانی سەرکەوتنێکی دراماتیکی و گرنگ لە دەرەوەی یاریگای خۆی بەرامبەر یانەی ئیسپانیۆل بەدەستبهێنێت.
لە گەڕی دووەمی لالیگادا، مێرەنگێ میوانی ئیسپانیۆل بوو و یارییەکەی بە ئەنجامی (2-1) لێ بردەوە. سەرەتای یارییەکە بۆ شاهانەکان نموونەیی بوو، کاتێک لە خولەکی 9دا جود بێلینگهام سوودی لە پاسێکی جوانی ئاردا گولەر وەرگرت و گۆڵی پێشکەوتنی تۆمارکرد.
بەڵام یانەی خاوەن ماڵ بە ئاسانی خۆی بەدەستەوە نەدا و لە خولەکی 30دا لە رێگەی ئەلێکس کالاترافا ئەنجامەکەی یەکسان کردەوە و ململانێی یارییەکەی گەرمتر کرد.
لە گێمی دووەمدا، جۆزێ مۆرینیۆ بۆ بەهێزکردنی هێڵی هێرشبەری و کۆنتڕۆڵکردنی یارییەکە، چەندین گۆڕانکاری ئەنجامدا؛ یان دیۆماندی و مارک کوکورێیای هێنایە ناوەوە، دواتریش هەریەکە لە ترێنت ئەلیکساندەر ئارنۆڵد، ئێدواردو کاماڤینگا و کارلۆس ئێسپیی خستە گەڕ.
دوای گوشارێکی زۆر و لێدانێکی ڤاڵڤێردی کە بەر ستوونی گۆڵ کەوت، دواجار لە خولەکی 90دا کارلۆس ئێسپی یەدەگ توانی گۆڵی سەرکەوتن بۆ ریال مەدرید تۆمار بکات و سێ خاڵی گرنگ بۆ تیمەکەی مۆرینیۆ مسۆگەر بکات.
