رووداو دیجیتاڵ
لە ساڵی 2020 لیۆنێل مێسی 15 یاریزانی لاوی وەک 'بەهرەی داهاتوو' لە وەشانی تایبەتی کارتەکانی چامپیۆنزلیگ دەستنیشانکرد؛ دوای تێپەڕبوونی شەش ساڵ، چارەنووسی ئەم یاریزانانە جیاوازییەکی زۆر پێشان دەدات لەنێوان بردنەوەی خەڵاتی باڵۆندۆر و مانەوە بەبێ یانە.
بەشێک لە هەڵبژێردراوەکانی مێسی گەیشتنە لووتکەی تۆپی پێی جیهان؛ عوسمان دێمبێلێ کە مێسی بە خاوەن خێراییەکی سامناک ناوی بردبوو، دوای قۆناخێکی پڕ لە پێکان لە بارسێلۆنا، لە پاریس سانجێرمان درەوشایەوە و لە ساڵی 2025 خەڵاتی باڵۆندۆری بەدەستهێنا.
کیلیان ئێمباپێ بەردەوام بوو لە تۆمارکردنی ریکۆردەکان لە پاریس سانجێرمان و دواتر لە ریال مەدرید.
فیل فۆدێن لە مانچێستەر سیتی بووە ئەندازیاری هێڵی ناوەڕاست و شەش نازناوی پرێمەرلیگ و چامپیۆنزلیگێکی بردەوە، هاوکات ترێنت ئەلێکساندەر ئارنۆڵد لە لیڤەرپوول درەوشایەوە و لە هاوینی 2025 پەیوەندی بە ریال مەدریدەوە کرد.
لە ریزی ئەستێرە ئاست جێگیرەکانی ئەورووپادا، فرێنکی دی یۆنگ بووە بڕبڕەی پشتی هێڵی ناوەڕاستی بارسێلۆنا. کای هاڤێرتز لەگەڵ چێڵسی چامپیۆنزلیگی بردەوە و دواتر بووە هێرشبەری سەرەکیی ئارسیناڵ.
ئێدێر میلیتاو سەرەڕای پێکانە تووندەکانی، دوو چامپیۆنزلیگ و سێ نازناوی لالیگای لەگەڵ ریال مەدرید بەدەستهێنا، هەروەها جۆشوا کیمیچ لە باڵی راستەوە بووە یەکێک لە باشترین یاریزانانی ناوەڕاست لە بایرن میونشن.
لە لایەکی دیکەوە، کریستیان پۆلیسیچ لە یانەی میلان ئاستی بەرز پێشکێش دەکات و بێنیامین پاڤارد لە ئینتەر نازناوی سێری ئای بردەوە. حوسام عەوار دوای لیۆن و رۆما رووی لە خولی رۆشەنی سعودی کرد و لوکا یۆڤیچیش دوای شکست لە ریال مەدرید و میلان، لە هاوینی 2025 چووە ئایک ئەسینای یۆنانی و لە وەرزی یەکەمیدا 21 گۆڵی تۆمارکرد.
بەڵام چارەنووسی بەشێکی دیکەیان بە ئاراستەیەکی پێچەوانەدا رۆیشت؛ مەیسن ماونت لە مانچێستەر یونایتد بەهۆی پێکانەوە لە پێکهاتەی سەرەکی دوورکەوتەوە.
جواو فیلیکس دوای ئەوەی بە 137 ملیۆن دۆلار لە بێنفیکاوە چووە ئاتلێتیکۆ مەدرید و بەخواستن لە چێڵسی، بارسێلۆنا و میلان یاریی کرد، لە هاوینی 2025 چووە یانەی نەسڕی سعودی لە تەنیشت کریستیانۆ رۆناڵدۆ.
لە هەمووان بێئومێدکەرتر، جەیدن سانچۆ بوو، کە لە بۆرووسیا دۆرتموند بەهاکەی 140 ملیۆن دۆلاری تێپەڕاندبوو، بەڵام دوای دابەزینی ئاستی لە مانچێستەر یونایتد و کۆتاییهاتنی ماوەکەی لەگەڵ ئاستۆن ڤێلا، ئێستا بەتەواوی بێ یانە ماوەتەوە.
ئەم دەرئەنجامانە دەیسەلمێنن کە بەهرەمەندبوون بەتەنیا بەس نییە، بەڵکو بەردەوامی، دووربوون لە پێکان و هەڵبژاردنی ژینگەی دروست، هۆکاری سەرەکین لەوەی یاریزانێک لە لووتکەی تۆپی پێدا بمێنێتەوە یان کاروانەکەی تووشی داڕمان ببێت.
