رووداو دیجیتاڵ
بەگوێرەی راپۆرتێکی رۆژنامەی ریکۆردی پۆرتوگالی، کریستیانۆ رۆناڵدۆی ئەفسانەی پۆرتوگالی بیر لە جێهێشتنی ریزەکانی یانەی نەسڕی سعودی دەکاتەوە، لەبەرئەوەی چەندین دەستەوارەی لە ئەورووپاوە پێگەیشتووە.
کریستیانۆ رۆناڵدۆی کاپتنی یانەی نەسڕی سعودی، لێکۆڵینەوە لە هەنگاوێکی چاوەڕواننەکراو دەکات دوای کۆتاییهاتنی گەشتەکەی لەگەڵ هەڵبژاردەی پۆرتوگال لە مۆندیالی 2026.
رۆناڵدۆ گرێبەستێکی لەگەڵ نەسڕ هەیە کە تاوەکو ساڵی 2027 بەردەوامە، و لە چەندین بۆنەدا رایگەیاندووە کە لە سعودیە هەست بە دڵخۆشی دەکات و بەنیازی بەردەوامبوونە لەگەڵ تیپەکەی، و جەختی کردووەتەوە کە دوای ئەو ئەزموونەی لەگەڵ یانەکەدا هەیەتی، خۆی بە بەشێک لە سعودیە دەزانێت.
دۆن بیر لە جێهێشتنی نەسڕ دەکاتەوە
بەگوێرەی رۆژنامەی ریکۆرد، ئەفسانە پۆرتوگالییەکە ئێستا بیر لە جێهێشتنی یانەی نەسڕ دەکاتەوە، ئەمەش لەژێر تیشکی ئەو گرنگیپێدانە زۆرەی کە لەلایەن چەندین یانەی گەورەی ئەورووپاوە بۆی هەیە لە بازاڕی گواستنەوەی هاوینەی داهاتوودا.
رۆژنامەکە ئاماژەی بەوە کردووە کە کریستیانۆ رۆناڵدۆ لێکۆڵینەوە لە جێهێشتنی یانەی نەسڕ دەکات، لە کاتێکدا گرێبەستەکەی تاوەکو ساڵی 2027ـە، و پێشبینی دەکرێت هەنگاوێکی یەکلاکەرەوە لە ژیانی وەرزشی خۆیدا بنێت.
ئاماژە بەوەش کراوە کە رۆناڵدۆ ئێستا خەریکی هەڵسەنگاندنی بژاردەکانی داهاتوویەتی پێش مۆندیالی 2026، ئەوەش دوای بەسەربردنی چەند وەرزێک لە خولی سعودی، لەکاتێکدا چەندین یانەی ئەورووپی بەوردی چاودێری ئاست و دۆخی دەکەن.
کریستیانۆ رۆناڵدۆ، کە تەمەنی41 ساڵە، هێشتا یەکێکە لە دیارترین ئەو هێرشبەرانەی کە یانە ئەورووپییەکان داوای دەکەن، و چەندین یانەی گەورە پەرۆشن بۆ ئەوەی لە هاوینی داهاتوودا گرێبەستی لەگەڵ واژۆ بکەن.
رۆژنامەکە جەختی کردەوە کە ئەگەری رۆیشتنی کریستیانۆ رۆناڵدۆ دەبێتە دیارترین رووداوی بازاڕی گواستنەوەی هاوینە، ئەگەر بڕیار بدات رووگەی خۆی بگۆڕێت و لە یانە سعوودییەکەی ئێستای دووربکەوێتەوە. ئەوکات دەگەڕێتەوە پاڵەوانێتییە دڵخوازەکەی، کە بە 'پاشای چامپیۆنزلیگ' ناسراوە و خاوەنی زۆترین گۆڵە لە مێژووی ئەو پاڵەوانێتییەدا.
لە ماوەی رابردوودا چەندین لێدوان و راپۆرتی رۆژنامەڤانی ناوی رۆناڵدۆیان بەگەڕانەوە بۆ خولی نایابی ئینگلیزی بەستووەتەوە، بەتایبەت لەگەڵ هەردوو یانەی مانچێستەر یونایتد و چێڵسی.
لەو کاتەوەی کریستیانۆ لە کۆتایی ساڵی 2022 یانەی مانچێستەر یونایتدی جێهێشت و لە سەرەتای 2023 پەیوەندی بە نەسڕەوە کرد، گفتوگۆکان لە ئینگلتەرا دەربارەی کاریگەرییەکانی رۆناڵدۆ و ئەگەری گەڕانەوەی یان تەنانەت وازهێنانی لە یاریگاکانی ئەورووپا نەوەستاون.
ئەم ئەستێرە پۆرتوگالییە بەردەوامە لە هەوڵەکانی بۆ گەیشتن بە خەونی تۆمارکردنی 1000 گۆڵی فەرمی، دوای ئەوەی تاوەکو ئێستا 965 گۆڵی تۆمارکردووە و تەنیا 35 گۆڵی ماوە بۆ گەیشتن بەو دەستکەوتە مێژووییە.
