رووداو دیجیتاڵ
تیاگۆ پیتارچ بەهرەمەندی یانەی ریال مەدرید کە تەمەنی 18 ساڵە، قۆناخێکی ناوازە بەسەردەبات دوای ئەوەی بە ئاستێکی بەرز لەگەڵ تیپی یەکەمدا دەرکەوت.
پیتارچ کە دەرچووی ئەکادیمیای ریال مەدریدە، ئاستێکی نایابی لەژێر سەرپەرشتی راهێنەر ئەلڤارۆ ئەربێلۆا پێشکێش کردووە و درەوشانەوەکانی دەستی کردووە بە راکێشانی سەرنجەکان لە دەرەوەی یانەی ریال مەدرید.
ماڵپەڕی 'Fichajes' ئاماژەی بەوە کردووە کە ریال مەدرید دەستەوارەیەکی لە ئینگلتەراوە پێگەیشتووە بۆ رێگەدان بە رۆیشتنی پێتارچ.
یانەی سەندەرلاند، دەستەوارەیەکی بەبڕی 15 ملیۆن یۆرۆ پێشکێش کردووە بۆ بەدەستهێنانی تواناکانی پیتارچ.
پیتارچ بەشداری لە راهێنانەکانی تیپی یەکەمدا دەکات و بەفەرمی لە 6 یارییدا دەرکەوتووە، ئاستێکی باشی پێشکێش کردووە و متمانەی ئەربێلوای راهێنەری بەدەستهێناوە.
ئەم یاریزانە بە توانای رێکخستنی یاری و تێگەیشتنی تەکتیکی پێگەیشتوو بەراورد بە تەمەنە بچووکەکەی جیادەکرێتەوە، وەک یاریزانێک سەیر دەکرێت کە توانایەکی گەورەی گەشەکردنی لە داهاتوودا هەیە.
یانەی سەندەرلاند پێیوایە پیتارچ بۆ بونیادنانی تیپێکی گەنجی رکابەر گونجاوە، هەروەها وەبەرهێنان لە داهاتوویدا بە بڕیارێکی ستراتیژی دادەنرێت، چ لە رووی وەرزشییەوە بێت یان ئابووری.
ئەم بڕە پارە زۆرە مشتومڕی لەنێو یانەی ریال مەدرید دروست کردووە، بەتایبەتی کە یاریزانەکە هێشتا بە تەواوی خۆی لە تیپی یەکەمدا نەسەلماندووە.
لە هەمانکاتدا، متمانەیەکی زۆر بە تواناکانی پیتارچ هەیە و ستافی تەکنیکی بڕوایان وایە کە مەودایەکی فراوانی بۆ گەشەکردن لەبەردەمدایە.
پێشتریش ریال مەدرید لەگەڵ بەهرەمەندەکانی دیکەی ئەکادیمیاکەی تووشی بارودۆخی هاوشێوە بووە، هەندێکیان زوو یانەکەیان جێهێشتووە، لەکاتێکدا هەندێکی دیکەیان بوونەتە یاریزانی سەرەکی لە تیپی یەکەمدا.
