رووداو دیجیتاڵ
بێرناردۆ سیلڤا، ئەستێرەی پۆرتوگالی و یەکێک لە کۆڵەکەکانی سەرکەوتنی 'سیتیزن' لە ساڵانی رابردوودا، بە فەرمی رایگەیاند کە لە کۆتایی ئەم وەرزەدا ماڵئاوایی لە یانەکە دەکات. سیلڤا لە لێدوانێکدا هۆکارەکانی ئەم بڕیارە و خۆشەویستی بێپایانی بۆ یانەکە ئاشکرا دەکات.
گەشتێکی پڕ لە دەستکەوت
سیلڤا لە تەمەنی 31 ساڵیدا، نۆیەم و دوایین وەرزی خۆی لە یاریگای 'ئیتیحاد' بەڕێدەکات.
لەگەڵ ئەو یانەیە لە 449 یاری 76 گۆڵ و 77 ئەسیستی تۆمارکردووە، لەگەڵ بەدەستهێنانی دەیان نازناوی نێوخۆیی و ئەورووپی، لەوانەش چوار نازناوی لەسەریەکی پرێمەرلیگ و نازناوی چامپیۆنزلیگ.
ئەگەر سیتی لە لیسبۆن بووایە، هەرگیز نەدەڕۆیشتم
سیلڤا بە راشکاوی باسی لەوە کردووە کە بڕیاری رۆیشتنی پەیوەندیی بە یانەکەوە نییە، بەڵکو پەیوەندی بە ژیانی تایبەتییەوە هەیە. ئەو دەڵێت:
"هەمیشە بە گاڵتەوە دەڵێم ئەگەر مانچێستەر لە باشووری ئەورووپا بوایە، تاوەکو ئەو کاتەی دەریان دەکردم لێرە دەمامەوە! من ئاشقی ئەم یانەیەم، هاوڕێکانم، ستافی تەکنیکی و هاندەرانم خۆشدەوێت، بەڵام جیاوازیی کولتووری، کەشوهەوا و شێوازی ژیان لەگەڵ پۆرتوگال، وایکردووە هەست بەو دڵخۆشییە تەواوە نەکەم کە دەمەوێت".
تەنیایی و قوربانیدان لەپێناو خەونەکان
ئەو ئەستێرە پۆرتوگالییە ئاماژەی بەوە کردووە کە پێش پێکهێنانی خێزان، کاتەکان بۆ ئەو لە مانچێستەر زۆر قورس بوون
"پێشئەوەی هاوژینەکەم بناسم، لێرە زۆر تەنیا بووم و هەستم بە دڵخۆشیی نەدەکرد. زۆر بیرم لە رۆیشتن کردەوە، نەک لەبەرئەوەی حەزم لە یانەکە نەبێت، بەڵکو تەنیا بۆ لایەنە کولتوورییەکەی ژیانم، بەڵام ئێستا دڵخۆشم کە مامەوە، چونکە توانیم ببینم چۆن مێژوومان نووسییەوە و سیانەی مێژووییمان بردەوە".
پەیامێک بۆ هاندەران و نەوەی نوێ
سیلڤا بە پێزانینەوە باسی لە هاندەرانی سیتی کرد و گوتی:
"کارادانەوەی هاندەران بەرامبەرم هەمیشە سەرسوڕهێنەر بووە. رەنگە لە شوێنی دیکە فیکەی ناڕەزایەتییان بۆ لێدابام کاتێک باسی رۆیشتنم دەکرد، بەڵام ئەوان رێزیان لە مرۆڤبوونم گرت. ئێستاش دڵنیام یانەکە لە دەستێکی پارێزراودایە، یاریزانە نوێیەکان هەمان تینوێتییان بۆ سەرکەوتن هەیە و دەزانن بۆ ئەوەی لێرە بیت، دەبێت هەمیشە براوە بیت".
لە کۆتاییدا، ماڵئاواییکردنی بێرناردۆ سیلڤا تەنیا کۆتایی هاتنی گرێبەستێکی وەرزشی نییە، بەڵکو کۆتاییهاتنی سەردەمی یەکێک لە دڵسۆزترین و داهێنەرترین ئەندازیارەکانی مانچێستەر سیتییە. هەرچەندە ئەو بەهۆی 'نامۆیی کولتووری و کەشوهەواوە' بڕیاری رۆیشتنی داوە، بەڵام ئەو میراتە گەورەیەی لە دوای خۆی جێی دەهێڵێت و ئەو نازناوانەی بۆ یانەکەی بەدەستهێنا، ناوی ئەو لە مێژووی 'ئیتیحاد' و پرێمەرلیگدا بۆ هەمیشە بە نەمری دەهێڵنەوە.
