رووداو دیجیتاڵ
یانەی شێروانە، لە یاریی گەڕانەوەی پلەی ئۆفی خولی پلە سێی عێراقدا رووبەڕووی یانەی دیر دەبێتەوە و لە یاریی چووندا تیپەکەی گەرمیان بە 3 گۆڵ بەرامبەر بە 2 گۆڵ یارییەکەی دۆڕاند و رۆژی هەینی میوانداری هەمان یانە دەکاتەوە.
هەڵمەت عادل راهێنەری یانەکە بە رووداو سپۆرتسی راگەیاند "ئێمە لە دەرەوەی یاریگای خۆماندا دوو گۆڵمان تۆمارکرد مەعقولە لە نێو یاریگای خۆماندا دوو گۆڵ تۆمار نەکەین؟".
لەسەر ئامادەکارییەکانی یانەکە بۆ یاریی گەڕانەوە، هەڵمەت عادل، راهێنەری یانەی شێروانە بە رووداو سپۆرتسی راگەیاند "یاریی چوون دەمانتوانی ببەینەوە، بەڵام بەڕاستی پلەی گەرمای بەسرە، کاریگەریی لەسەر ئاستی تیپەکە هەبوو، لە کاتی یارییەکەدا لە یاریزانەکانم پرسی وەزعتان چۆنە، پێیان گوتم، وەڵڵا کاپتن لە ژێرەوە دەسووتێین، فریزەکە تارتانە و زۆر گەرمە. بۆیە ئەم یارییە دەبێت قەرەبووی یاریی رابردوومان بکەینەوە و سەربکەوین بۆ خولی پلە دووەکانی عێراق".
یاریی چوون، بەئەنجامی 3-2 کۆتایی هات، ئایا ئەگەر شێروانە بە گۆڵێکی بێ بەرامبەر یارییەکەی بردەوە، دەبێتە 3-3، بەم ئەنجامە چارەنووسی یارییەکە چی بەسەردێت؟ هەردی جەلال، بەرپرسی راگەیاندنی یانەی شێروانە لەو بارەیەوە وەڵامی رووداو سپۆرتسی دایەوە و گوتی "لە ئەگەری یەکسانبوون، یارییەکە دەچێتە کاتی زیادکراو، واتا وەک سیستمە نوێیەکەی چامپیۆنزلیگە".
یانەی شێروانە لە هەمان کۆمەڵەی یانەی ئاکرێ بوو و بەڵام بە پلەی دووەم سەرکەوت بۆ پلەی ئۆفی خولی پلە سێیەکانی عێراق.