رووداو دیجیتاڵ
ئەمڕۆ شەممە 25ی تەممووزی 2026 بەهۆی پێکدادانی دوو پاس لە رێگەی دێرەزوور - دیمەشق لانیکەم 35 کەس گیانیان لەدەستدا و دەیان کەسی دیکەش بریندار بوون؛ یەکێک لە پاسەکان ئەندامانی هێزەکانی ئاسایشی ناوخۆی سووریای تێدابووە.
بەڕێوەبەرایەتیی فریاکەوتن و بەڕێوەبردنی کارەساتەکان لە دێرەزوور بە تۆڕی میدیایی رووداوی راگەیاند، "بەپێی ئامارە سەرەتاییەکانی رووداوەکە، 35 کەس گیانیان لەدەستداوە و دەیانی دیکەش بریندارن." ئاماژەی بەوەش کرد، "رووداوەکە بەهۆی خێرایی زۆرەوە روویداوە."
بەڕێوەبەرایەتییەکە روونیکردەوە، "بریندارەکان گواستراونەتەوە بۆ نەخۆشخانەی تەدموور."
نەجیب نەعسان، بەڕێوەبەری بەڕێوەبەرایەتیی فریاکەوتن و فریاگوزاری لە وەزارەتی تەندروستیی سووریا بە ئاژانسی فەرمیی سانا-ی راگەیاندووە، جگە لە گیانلەدەستدانی 35 کەس، 30 کەسی دیکەش بریندار بوون.
لە لایەکی دیکەوە، بەرگریی شارستانیی سووریا رایگەیاند، تیمەکانیان بەدەم رووداوەکەوە چوون کە لە ناوچەی نێوان سوخنا و تەدموور روویدا، توانییان "ئەو ئاگرەی لە ئەنجامی رووداوەکە کەوتووەتەوە، کۆنترۆڵ بکەن،" کار بۆ گواستنەوەی قوربانیان دەکەن بە هاوکاریی تیمەکانی وەزارەتەکانی ناوخۆ و تەندروستی.
لە بەرامبەردا، وەزارەتی ناوخۆی سووریا "نیگەرانی و خەمی قووڵی" خۆی بۆ رووداوەکە دەربڕی، جەختی لەوە کردووەتەوە رووداوەکە "لەنێوان پاسێکدا کە ژمارەیەک لە ئەندامانی هێزەکانی ئاسایشی ناوخۆیی تێدابووە، لەگەڵ پاسێکی مەدەنیدا" روویداوە.
وەزارەتی بەرگریی سووریاش رایگەیاند، "ژمارەیەک هەلیکۆپتەریان ناردووە بۆ فریاکەوتنی بریندارەکان و گواستنەوەیان بۆ نەخۆشخانەی سەربازیی حومس."
بەپێی بەڕێوەبەرایەتیی راگەیاندن و پەیوەندییەکان لە وەزارەتی فریاکەوتن و بەڕێوەبردنی کارەساتەکان، کۆی گشتیی رووداوەکان لە ماوەی 5 مانگی یەکەمی ساڵی 2026، گەیشتووەتە 1461 رووداو، کە بوونەتە هۆی گیانلەدەستدانی 81 کەس و برینداربوونی 1333 کەس.
