رووداو دیجیتاڵ
دادگەی تاوانەکانی سووریا سزای لەسێدارەدانی بۆ وەسیم ئەسەد ئامۆزای بەشار ئەسەد دەرکرد.
دادگەی تاوانەکانی سووریا بە تاوانی پێکهێنانی گرووپی چەکدار و بەکۆمەڵکوشتنی خەڵکی سڤیل سزاکەی بۆ دەرکرد
ئەمە دوای ئەوە هات، رۆژی سێشەممە، 11ی ئاب دادگای تاوانەکانی دیمەشق، سزای لە سێدارەدانی بۆ سەرۆکی پێشووی سووریا و برایەکی و ژمارەیەک لە گەورە بەرپرسانی سەربازی و ئەمنیی پێشووی ئەو وڵاتە دەرکرد.
فەخرەدین عەریان، دادوەری دادگەی چوارەمی تاوانەکانی دیمەشق، لە کاتی خوێندنەوەی بڕیارەکاندا رایگەیاند، بەپێی لێکۆڵینەوەکان و گوتەی شایەتحاڵەکان، ئەو تاوانانەی دراونەتە پاڵ بەشار ئەسەد، دەچنە چوارچێوەی "تاوان دژی مرۆڤایەتی".
فەخرەدین عەریان ئاماژەی بەوە کرد، بەشداریی بەشار ئەسەد لەو تاوانانەدا وەک "خاوەنی باڵاترین بڕیار" بووە لە دەوڵەتدا و تەواوی دەزگاکانی وڵاتی بۆ کردنی ئەو تاوانانە بەکارهێناوە. دادگەکە بەشار ئەسەدی بە تاوانباری سەرەکی لە دۆسیەکانی "کوشتنی بە ئەنقەستی زیاتر لە کەسێک و منداڵان، ئەشکەنجەدان، دەستگیرکردنی هەڕەمەکی و تاوان دژی مرۆڤایەتی" ناساند و بڕیاری لەسێدارەدانی بۆ دەرکرد.
لە بەشێکی دیکەی بڕیارەکەدا، دادگەکە سزای لەسێدارەدانی بۆ عاتیف نەجیب، سەرۆکی پێشووی لقی ئەمنی سیاسیی لە دەرعا، کە کوڕە خاڵی بەشار ئەسەدیشە، دەرکرد. هەروەها سزای لەسێدارەدان بۆ ژمارەیەک لەو فەرماندە و بەرپرسانەی کە ئێستا هەڵاتوون و ناوەکانیان لە دۆسیەکەدا هاتووە دەرکرا.
