رووداو دیجیتاڵ
یاریدەدەری سەرۆککۆماری تورکیا رایگەیاند، دەستەی جێبەجێکار کە لە چوارچێوەی پرۆسەی چارەسەری ناسراو بە پرۆسەی "تورکیای بێ تیرۆر"ە، رۆژی دووشەممە، 28ـی ئەیلوولی 2026 دووەم کۆبوونەوەی خۆی دەکات.
ئێوارەی رۆژی یەکشەممە، 27ـی ئەیلوولی 2026 جەودەت یڵماز، بەشداریی لە "کۆڕبەندی ریشسپییانی ناوچەکانی رۆژهەڵات و باشووری رۆژهەڵاتی ئەنادۆڵ"دا کرد لە شاری ئیستەنبووڵ.
لە گوتارەکەیدا کە لەو کۆڕبەندا پێشکێشی کرد، یاریدەدەری سەۆرککۆماری تورکیا ئاماژەی بە کارەکانی دەستەی جێبەجێکاری یاسای تایبەت بە پرۆسەی چارەسەری کرد و گوتی : "پەنا بەخوا سبەی دووەم کۆبوونەوەمان ئەنجام دەدەین."
یڵماز ئەرکی دەستەکەی بە "بەدواداچوونی پرۆسەکە" چوواند و ئاشکرای کرد، لەم چوارچێوەیەدا چوار لیژنەی لاوەکییان پێکهێناوە.
لیژنە لاوەکییەکان و ئەرکەکانیان
جێگری سەرۆککۆماری تورکیا ئەرکی لیژنەکانی بەم شێوەیە روونکردەوە:
1.لیژنەی پرۆسەی دادوەری و یاسایی: ئەم لیژنەیە چاودێریی رەهەندە یاسایی و دادوەرییەکانی پرۆسەکە دەکات.
2.لیژنەی یەکگرتنی کۆمەڵایەتی و هاوئاهەنگی: کار لەسەر بەهێزکردنی یەکگرتوویی و سازانی کۆمەڵایەتی دەکات.
3.لیژنەی چاودێریکردنی مەیدان: ئەرکی چاودێریکردن و بەدواداچوونی بارودۆخی مەیدانیی پرۆسەکەی لە ئەستۆیە.
4.لیژنەی چەکدانان و هەماهەنگیی ستراتیژی: ئەم لیژنەیە تایبەتە بە بابەتی چەکدانان و هەماهەنگییە ستراتیژییەکانی پەیوەست بە پرۆسەکەوە.
دەستەی هاوئاهەنگیی پاڵپشتی و یەکگرتنی نیشتمانی کە بە (دەستەی بەدواداچوون و هەڵسەنگاندن)ـی پرۆسەی چارەسەری ناسراوە، لە چوارچێوەی یاسای ژمارە 7595 (یاسای پاڵپشتی نیشتیمانی و بەهێزکردنی کۆمەڵایەتی)ـی تایبەت بە پرۆسەی چارەسەری دامەزراوە.
ئەو دەستەیە بە سەرۆکایەتیی جێگری سەرۆککۆمار جەودەت یڵماز پێکهێندراوە و هەریەک لە وەزیرانی داد، بەرگری، ناوخۆ، دەرەوە و سەرۆکی دەزگای هەواڵگری نیشتیمانی (میت) و سکرتێری سەرۆککۆمار و سەرۆکی ئەنجوومەنی ئاسایشی تورکیا تێدا ئەندامن.
یەکەم کۆبوونەوەی ئەو دەستەیە لە 24ی ئابی 2026 ئەنجامدرا.
