رووداو دیجیتاڵ
نوعمان کورتوڵموش، سەرۆکی پەرلەمانی تورکیا، لەبارەی پرۆسەی چارەسەرییەوە دەڵێ، قۆناخی زۆر باشی بڕیوە و بۆ یەکەمجارە لە پەرلەمانەوە بەڕێوەدەبردرێ.
نوعمان کورتوڵموش، سەرۆکی پەرلەمانی تورکیا، ئەمڕۆ هەینی تیشکی خستە سەر دوایین پەرەسەندنەکانی پرۆسەی چارەسەریی پرسی کورد لە وڵاتەکەیدا و رایگەیاند، دوای نزیکەی 50 ساڵ هەوڵ دەدرێ کۆتایی بەو دۆخە بهێندرێ لە وڵاتەکەیدا هەیە و گوتی، "ئێستا نەخشەرێگەیەک لەبەردەمماندایە و بە چڕی کاری لەسەر دەکەین."
سەرۆکی پەرلەمانی تورکیا ئاماژەی بەوە دا کە پەسندکردنی یاسای پرۆسەی چارەسەری لە پەرلەماندا دەرخەری ویستی بەهێز و هاوبەشی گەلە؛ باسی لەوەشکرد، سەرخستنی پرۆسەکە پێگەی هەرێمی و نێودەوڵەتیی تورکیا بەهێزتر دەکات.
کورتولموش گوتی، "ئێستا پرۆسەی چارەسەری رۆژەڤی یەکەمی سیاسی و یاسایی تورکیایە."
لە بەشێکی دیکەی قسەکانیدا، کورتوڵموش باسی لە دۆخی ناوچەکە کرد و رایگەیاند، "نزیکەی 3 ساڵە تەقەیەک نەکراوە، بۆمبێک نەتەقیووەتەوە و کەس نەکوژراوە، چیدیکە دایکان فرمێسک لەسەر تەرمی رۆڵەکانیان ناڕێژن. بۆ نموونە، چیای گابار کە یەکێک بوو لە مەترسیدارترین ناوچەکان، ئەمڕۆ رۆژانە 82 هەزار بەرمیل نەوت بەرهەم دەهێنێت و رۆڵەی ناوچەکە کاری تێدادەکەن، سوودمەند دەبن و ناوچەکەش دەوڵەمەندتر بووە."
سەبارەت بە هەنگاوەکانی داهاتوو، کورتولموش ئەوەی خستەڕوو کە لە ڕێگەی کۆمیسیۆنەکانی پەرلەمانەوە چاودێری پێشهاتەکان دەکەن و لە نزیکەوە چاودێری پرۆسەی هەڵوەشاندنەوەی گرووپەکانی وەک (یەبەشە) لە سنووری شنگال و تێکەڵبوونیان بە هێزەکانی حکومەتی عێراق دەکەن.
نوعمان کورتوڵموش رایگەیاند، "شەڕمان ناوێ، ئاشتیمان دەوێ؛ جوداخوازیمان ناوێ، یەکپارچەییمان دەوێ."
