رووداو دیجیتاڵ
ڤلادیمیر پووتین، سەرۆکی رووسیا ئەگەری کۆبوونەوەی لەگەڵ ڤۆلۆدیمیر زێلێنسکی، سەرۆکی ئۆکراینا لە داهاتوویەکی نزیکدا رەت دەکاتەوە، ئەوەش تەنیا رۆژێک دوای ئەوە دێت کە زیلینسکی داوای دیدارێکی رووبەڕووی کرد بۆ کۆتاییهێنان بە جەنگی چوار ساڵەی نێوان هەردوو وڵات.
رۆژی هەینی، 5ـی حوزەیرانی 2026، ڤلادیمیر پووتین لە (کۆڕبەندی ئابووریی سان پیتەرسبۆرگ) رایگەیاند کە "هیچ سوودێک" لە کۆبوونەوە لەگەڵ زیلینسکی نابینێت تاوەکو ئەو کاتەی لەسەر مەرجەکانی رێککەوتنی ئاشتی رێککەوتن دەکرێ. ئەم لێدوانەش وایکرد کێیڤ کاردانەوەی هەبێت و سەرۆکی رووسیا بە "لاواز" ناوببات کە "جەنگی هەڵبژاردووە."
سەرۆکی رووسیا بەڵێنی دا کە هێرشە سەربازییەکانی وڵاتەکەی بەردەوام بن تاوەکو هەموو ئامانجەکانی جەنگ بە تەواوی بەدەست دێن.
رووسیا جەخت لە کۆنترۆڵکردنی هەرێمی دۆنباس لە رۆژهەڵاتی ئۆکراینا و سەپاندنی سنوورداریی سیاسی و سەربازیی تووند بەسەر دراوسێیەکەیدا دەکات؛ مەرجگەلێک کە کێیڤ و هاوپەیمانەکانی وەک "خۆبەدەستەوەدان" دەیبینن و رەتی دەکەنەوە.
تاوەکو ئێستا دانوستاندنەکانی ئاشتی کە بە نێوەندگیریی ئەمریکا بەڕێوەدەچن، نەیانتوانیوە هەردوولا لە رێککەوتن نزیک بکەنەوە.
وەڵامی پووتین بۆ داواکەی زیلینسکی
رۆژی پێنجشەممە، زیلینسکی پەیامێکی ئاراستەی پووتین کرد و تێیدا گوتی: "ئۆکراینا پێشنیازی کۆتاییهێنان بەم جەنگە دەکات لە رێگەی دانیشتنی راستەوخۆی نێوان من و تۆ. پێشنیازی کۆبوونەوە دەکەم و داواکارم کاتێکی دیاریکراوی بۆ دابنرێ."
ئەمرۆ پووتین لە وەڵامدا گوتی: "هیچ مانایەک لە کۆبوونەوەکەدا نابینم. با شارەزایان کار بکەن و هەندێک چارەسەر گەڵاڵە بکەن، ئینجا دەتوانین کۆببینەوە."
لەوەتەی رووسیا لە شوباتی 2022دا ئۆپەراسیۆنە سەربازییەکەی بۆسەر ئۆکراینا دەستپێکردووە، دەیان هەزار کەس کوژراون، ناوچەیەکی فراوانی رۆژهەڵات و باشووری ئۆکراینا وێران بووە و ملیۆنان کەسیش ئاوارە بوون.
پووتین پەیامەکەی سەرۆکی ئۆکراینای بە "ناشیرین و بێڕێزانە" ناوبرد و گوتی: "مەبەست لێی چییە؟ ئامرازێکە بۆ دروستکردنی کەشێکی گونجاو بۆ کۆبوونەوە یان بۆ ئەوەیە دڵنیابنەوە لەوەی کە هیچ کۆبوونەوەیەکی کەسی ئەنجام نادرێ؟ پێم وایە ئەوەی دووەمیان مەبەستەکەیە."
پووتین جەختی کردەوە کە نایەوێ قسە لەگەڵ زیلینسکی بکات و باسی سوپای وڵاتەکەی کرد و گوتی: "وڵات شانازیتان پێوە دەکات و هیوایەکی زۆرمان لەسەر هەڵچنیون."
ئەو لێدوانانەی پووتین لە کاتێکدایە، جەنگی نێوان هەردوو وڵات چووەتە قۆناخێکی ئاڵۆزەوە و هەوڵە دیپلۆماسییەکان بەهۆی زیادبوونی هێرشە مەیدانییەکانەوە گەیشتوونەتە بنبەست
"نێردەیەکمان ناردە کێیڤ، بەڵام ئەوان کچیان کوشت"
پووتین بیرۆکەی "کۆبوونەوە تەنیا لەبەر کۆبوونەوە" لەگەڵ زیلینسکی رەتکردەوە و بۆ یەکەمجاریش ئاشکرای کرد کە مانگی رابردوو نێردەیەکی ناردووەتە کێیڤ، بەڵام وەڵامی ئۆکراینا "کوشتنی منداڵان" بوو.
پووتین گوتی، مانگی رابردوو، بازرگانێکی رووسیا وەک نێردەیەکی نافەرمی چووەتە کێیڤ و لەگەڵ حکومەتی ئۆکراینا کۆبووەتەوە، ئەوەش لەسەر داوای لایەنی ئۆکراینی بووە. بەڵام وەک سەرۆکی رووسیا دەڵێ، تەنیا رۆژێک دوای ئەو دیدارە، هێزەکانی ئۆکراینا لە رێگەی چەندین شەپۆلی درۆنی بۆمبڕێژکراوەوە بەشەناوخۆییەکیان لە لووگانسک بۆردوومان کرد، کە لە ئەنجامدا 21 کەس کوژران و زۆربەی قوربانییەکانیش کچی گەنج بوون.
سەرۆکی رووسیا ئەو ساتەی بەبیر هێنایەوە کە لە نێردەکەی پرسیوە: "واتای ئەمە چییە؟ ئەوان داوای کۆبوونەوە دەکەن و لە هەمان کاتدا هێرشی دڕندانە و ئاشکرای وەک کوشتنی منداڵان ئەنجام دەدەن؟" وەک پووتین دەڵێت، نێردەکە پێی گوتووە کە ئۆکراینییەکان گوتوویانە "هیچ روونکردنەوەیەکمان بۆ ئەمە نییە."
.
زیلینسکی: پووتین جەنگی هەڵبژارد
زیلینسکی پێی وایە کۆبوونەوەی هەردوو سەرۆکەکە پێویستە بۆ یەکلاییکردنەوەی پرسە سەرەکییەکانی رێککەوتنی ئاشتی. زیلینسکی دوای وەڵامەکەی پووتین گوتی: "بەداخەوە لایەنی رووسی جارێکی دیکە جەنگی هەڵبژاردەوە. هەمووان وەڵامەکەی ئەمڕۆیان بیست؛ وەڵامێکی لاواز بوو. ئەو بە سادەیی نایەوێ جەنگ کۆتایی بێت."
پێشنیازەکەی زیلینسکی پاڵپشتیی هاوپەیمانە سەرەکییەکانی وەک دۆناڵد ترەمپ و ئیمانوێل ماکرۆنی هەبوو. بڕیارە رۆژی یەکشەممە زیلینسکی لە لەندەن لەگەڵ ئیمانوێل ماکرۆن، سەرۆکی فەرەنسا؛ کییەر ستارمەر، سەرۆکوەزیرانی بەریتانیا و فریدریش مێرتس، راوێژکاری ئەڵمانیا کۆببێتەوە بۆ ئەوەی وزەیەکی نوێ بداتە هەوڵەکانی کۆتاییهێنان بە جەنگ.
پووتین لەبەردەم کۆمەڵێک بازرگان و میوانی بیانی لە کۆڕبەندەکە گوتی: "کردە سەربازییەکان رۆژێک لە رۆژان کۆتاییان دێت، بێگومان کاتێک کۆتایییان دێت کە ئێمە ئەو ئامانجانەمان بەدەستهێنان کە بۆ خۆمان دیاریمان کردوون."
ئابووریی رووسیا
سەرۆکی رووسیا هەموو ئەو دەنگۆیانەی رەتکردنەوە کە دەڵێن ئابووریی رووسیا بەهۆی تێچووی زۆری جەنگەوە خەریکە دەڕوخێت، سەرەڕای بەرزبوونەوەی نرخ، زیادکردنی باج و گەیشتنی تێچووی قەرزکردن بۆ بەرزترین ئاست لە 20 ساڵی رابردوودا.
پووتین گوتی: "ئێمە رەخنە لە هەموو لایەکەوە دەبیستین کە دەڵێن هەموو شتێک رووخاوە، بەڵام ئێمە گەیشتووینەتە هەمان ئەو ئاستەی کە وڵاتانی ناوچەی یۆرۆ لە چەند ساڵی رابردوودا تێیدا بوون؛" جەختیشی کردەوە کە رووسیا خەریکی بونیادنانی ئابوورییەکی خاوەن "سەروەر"ییە.
