رووداو دیجیتاڵ
دادگەی باڵای بەریتانیا بڕیارێکی مێژوویی دا بۆ دووبارە لێکۆڵینەوە لە دۆسیەی مردنی مێردمنداڵێکی تەمەن 14 ساڵ، کە گومان دەکرێت بەهۆی "تەحەدایەکی" تیکتۆکەوە گیانی لەدەستدابێت. ئەم بڕیارە دوای ئەوە هات کە دایکی مێردمنداڵەکە بۆ ماوەی چوار ساڵ بەردەوام بوو لە ئاشکراکردنی راستییەکان.
جووڵز سوینی، مێردمنداڵێکی دانیشتووی ناوچەی گڵۆستێرشایەر لە بەریتانیا، لە نیسانی ساڵی 2022 گیانی لەدەستدا. دایکی جووڵز، ئێلین رووم، رژد بوو کە کوڕەکەی بووەتە قوربانیی "تەحەدای بێهۆشبوون" (Blackout Challenge) لە تۆڕی کۆمەڵایەتیی تیکتۆک.
هەڵوەشاندنەوەی بڕیاری پێشوو
دادوەرانی دادگەی باڵا بڕیاری لێکۆڵینەوەی یەکەمی ساڵی 2022ـیان هەڵوەشاندەوە، چونکە ئەو کات لێکۆڵینەوەکە تەنیا 23 خولەکی خایاندبوو و هیچ بەڵگەیەکی نێو مۆبایل و سۆشیاڵ میدیای جووڵز رەچاو نەکرابوو. ئێلین رووم دوای پشکنینێکی تایبەت بۆ مۆبایلی کوڕەکەی، بەڵگەی نوێی دۆزیوەتەوە کە نیشانی دەدەن جووڵز ئالوودەی تیکتۆک بووە.
دایکی جووڵز بە گریانەوە گوتی: "بۆ ماوەی زیاتر لە چوار ساڵ، هەموو رۆژێک بۆ دەرکەوتنی راستیی مردنی کوڕە جوانەکەم جەنگام. ئەمڕۆ دادگە دانی بەوەدا نا کە چەندین پرسیار هەن پێویستە وەڵام بدرێنەوە."
یاسای جووڵز
ئەم هەوڵانەی ئێلین رووم بوونە هۆی پەسندکردنی یاسایەک بە ناوی (یاسای جووڵز) لە 29ـی نیسانی 2026، کە کۆمپانیاکانی تەکنەلۆژیا پابەند دەکات داتای سۆشیاڵ میدیای منداڵان دوای مردنیان بپارێزن تاوەکو بۆ لێکۆڵینەوە بەکاربهێندرێن. هەروەها ئێلین لەگەڵ چوار خێزانی دیکەی بەریتانی، لە ویلایەتی دێلاوێری ئەمریکا سکاڵای یاساییان لەسەر کۆمپانیای (بایت دانس)ـی خاوەنی تیکتۆک تۆمار کردووە.
تەحەدا مەترسیدارەکانی سۆشیاڵ میدیا لەم ساڵانەی دواییدا بوونەتە هەڕەشەیەکی گەورە بۆ سەر ژیانی مێردمنداڵان. "تەحەدای بێهۆشبوون" یەکێکە لە مەترسیدارترینەکان کە تێیدا داوا لە بەشداربووان دەکرێت هەناسەی خۆیان رابگرن تاوەکو لەهۆش خۆیان دەچن.
ئەم دۆسیەیە گوشارێکی زۆری خستووەتە سەر کۆمپانیاکانی سۆشیاڵ میدیا بۆ چاودێریکردنی وردتری ناوەڕۆکەکان. ئێستا بەریتانیا لە قۆناخێکی نوێی یاساییدایە بۆ پاراستنی منداڵان لە جیهانی دیجیتاڵیدا.
