رووداو دیجیتاڵ
هەزاران کۆچبەر بە لێشاو لە مەغریبەوە بەرەو ناوچە و شاری سنووریی (سیوتا)ی ئیسپانیا بەڕێکەوتن، ئەمەش بەرپرسانی ناوخۆیی ناچار کرد داوای هاوکاریی بەپەلە لە حکومەتی نیشتمانیی ئیسپانیا لە مەدرید بکەن بە مەبەستی کۆنترۆڵکردنەوە و گەڕاندنەوەی ئارامی بۆ سەر سنوورەکە.
گوشاری کۆچبەران و رێکارە ئەمنییەکانی مەدرید
ئەو ڤیدیۆ و وێنانەی لە سنوورەکەوە بڵاوکراونەتەوە، دەیان کەس نیشان دەدەن کە زۆربەیان مەغریبین و بە کەناراوەکانی نزیک خاڵی پشکنینی سنووریی مەغریبەوە دەڕۆن بەرەو شارەکە. زۆربەی کۆچبەرەکان گەنجن، هەرچەندە خێزان و منداڵ و ژنیشیان لەگەڵدایە.
وەزارەتی ناوخۆیی ئیسپانیا لە راگەیێندراوێکدا ئاماژەی بەوە کرد، ئاسایشی هاووڵاتیانی خۆی و یەکپارچەیی سنوورەکانی گەرەنتی دەکات، بەڵام حکومەت ناتوانێت بەهۆی پرسی کۆچبەرییەوە باری نائاسایی لە وڵاتدا رابگەیێنێت.
ئەم پێشهاتانە لە کاتێکدایە، گوشاری زۆری کۆچبەران بۆسەر سنوورەکە دوای هەوڵە چڕەکانی پێشوویان دێت، کە زۆربەیان لە رێگەی مەلەکردنەوە هەوڵی بەزاندنی سنووریان داوە.
پێگەی جوگرافیی هەردوو شاری سیوتا و مەلیلا
چوونی ئەم کۆچبەرانە دوای ئەوە هات، دەنگۆی ئەوە بڵاوکرایەوە، بەرەبەیانی رۆژی پێنجشەممە سنوورەکان دەکرێنەوە.
هەردوو شاری سیوتا و مەلیلا (کە نزیکەی 400 کیلۆمەتر لە باشووری سیوتاوە دوورە)، دەکەونە کەناراوەکانی باکووری دەریای نێوەڕاست لە ئەفریقا. ئەم دوو شارە سەر بە ئیسپانیان و تەنیا سنووری زەوینیی یەکێتیی ئەوروپان لەگەڵ کیشوەری ئەفریقا.
شاری سیوتا کە لە ساڵی 1580ـەوە لەژێر دەسەڵاتی ئیسپانیادایە، دانیشتووانێکی تێکەڵ لە کریستیان و موسڵمان، لەگەڵ هاووڵاتیانی ئیسپانی و مەغریبی و کرێکارانی رۆژانە لەخۆدەگرێ کە بە ئاشتی و تەبایی پێکەوە دەژین.
گرژییە دیپلۆماسییەکانی نێوان مەدرید و رەبات
مەغریب بە فەرمی دان بە شاری سیوتا و مەلیلادا نانێت وەک خاکی ئیسپانیا، زۆرجاریش وەک ناوچەی داگیرکراو ناویان دەبات. سیوتا کە دانیشتووانەکەی 85 هەزار کەسە، لەم ساڵانەی دواییدا بووەتە خاڵی گەرمی قەیرانە دیپلۆماسییەکان و دانوستاندنەکانی نێوان مەدرید و رەبات.
زۆرێک لەو کۆچبەرانەی دەگەنە سیوتا یان مەلیلا، یەکسەر دەگەڕێندرێنەوە، لە کاتێکدا ئەوانی دیکە لە سەنتەرەکانی پێشوازیی کۆچبەران دەهێڵدرێنەوە تاوەکو دۆسیەکانیان لێکۆڵینەوەی لێ دەکرێ و بتوانن داوای مافی پەنابەری لە ئیسپانیا بکەن.
رێگەکانی گەیشتن بە سیوتا
بۆ گەیشتن بە سیوتا، کۆچبەران زۆرجار لە شارۆچکەی کاستیلیخۆسی مەغریبەوە مەلە دەکەن، کە نزیکەی 5 کیلۆمەتر بە دەوریدا دەبڕن تاوەکو دەگەنە خاکی ئیسپانیا.
هەندێکی دیکەشیان هەوڵ دەدەن لە شارۆچکەی بلیونشی هاوسێوە کە دوورییەکەی کەمترە، سنوورەکە ببەزێنن.
