جەی دی ڤانس: گوشاری ئابووری بۆ سەر ئێران باشترین رێگەیە بۆ بردنەوەمان

لە هەڤپەیڤینێکدا لەگەڵ کەناڵی فۆکس نیووز، ڤانس ئاماژەی بەوە کرد کە شەڕی ئەمریکا و ئێران ئێستا "پێی ناوەتە قۆناخێکی نوێ".

ڤانس جەختی کردەوە کە دەبێت گوشارە ئابوورییەکانی سەر ئێران بەردەوام بن و گوتیشی: "پێمان وایە ئەوە باشترین رێگەیە بۆ ئەوەی لە کۆتاییدا هەموو ئامانجێکمان بەدەستبهێنین."

ڤانس هەروەها رایگەیاند کە واشنتن هەوڵ دەدات "ئەو دۆخەی هەیە بگۆڕێ" و بۆ هەمیشە رێگری لە تاران بکات بۆ ئەوەی نەتوانێت جارێکی دیکە هەوڵیش بدات چەکی ئەتۆمی بەدەستبهێنێت.

سەبارەت بە تەنگەی هورمز، جێگری سەرۆکی ئەمریکا روونیکردەوە کە هێزەکانی ئەمریکا سەرکەوتوو بوون لە گواستنەوەی نەوت و گاز بەنێو ئەو رێڕەوە ئاوییەدا، بەڵام جەختیشی کردەوە کە "دەبێت بڕێکی زۆر زیاتر ببەینە دەرەوە."

هەر رۆژی پێنجشەممە، عەباس عێراقچی، وەزیری دەرەوەی ئێران بە تووندی وەڵامی هەڕەشەکانی ئەمریکای لەبارەی زیادکردنی گوشارە ئابوورییەکان دایەوە رایگەیاند، ئەم جۆرە "سیاسەتە شکستخواردووانە" تەنیا ئێرانییەکان تووڕەتر دەکات و "شکستی زیاتریش دەهێنن."

ئەوەش چەند کاژێرێک دوای ئەوە کە دۆناڵد ترەمپ، سەرۆکی ئەمریکا هەڕەشەی سەپاندنی "رێوشوێنی ئابووریی تووندی" دژی ئێران کرد و بەڵێنی "جەنگی ئابووری و گۆشەگیری لەسەر ئاستێکی بێ پێشینە" دا. ترەمپ وردەکاریی زیاتری نەدا کە بە چ رێگەیەک گوشارەکە دەکات.

عێراقچی لە پۆستێکدا لە تۆڕە کۆمەڵایەتییەکان رایگەیاند، ئامانجی ئەم هەڕەشانە، لادانی سەرنجی رای گشتیی ئەمریکایە لەسەر کێشە داراییەکانی نێوخۆی وڵاتەکەیان و ئاماژەی بەوەش کرد، "تیرۆری ئابووریی ئەمریکا هەڕەشەیە بۆسەر ئابووریی جیهان و سەروەریی نیشتمانیی وڵاتان."

لەلایەکی دیکەوە سکۆت بێسێنت، وەزیری گەنجینەی ئەمریکا رۆژی پێنجشەممە رایگەیاند، ئێران رووبەڕووی "گەورەترین گۆشەگیریی ئابووریی رێکخراو لە مێژووی جیهان"دا دەبێتەوە.

لە هەڤپەیڤینێکدا لەگەڵ میدیای وڵاتەکەی، بێسێنت هەڕەشەی سەپاندنی سزای لاوەکی بەسەر ئەو وڵات و کۆمپانیایانەدا کرد کە بازرگانی لەگەڵ ئێران دەکەن و گوتی، کاتی ئەوە هاتووە هاوپەیمانەکانی ئەمریکا بڕیار بدەن لە چ بەرەیەکدا دەبن. هەرچەندە ناوی نەهێنان، بەڵام چین و هیندستان گەورەترین کڕیاری نەوتی ئێرانن.