رووداو دیجیتاڵ
حکومەتی تاڵیبان لە ئەفغانستان پێشنیازێکی خستووەتە بەردەم کۆمپانیا ئەمریکییەکان بۆ ئەوەی دەستیان بە سەرچاوە کانزاییە زەبەلاحەکانی ئەو وڵاتە بگات، ئەمەش وەک هەوڵێک دەبینرێت بۆ سووککردنی سزاکان و ئازادکردنی سەرمایە سڕکراوەکانی ئەفغانستان لەلایەن واشنتنەوە.
رۆژی دووشەممە، 31ی ئابی 2026، ئەمیر خان موتەقی، وەزیری دەرەوەی حکومەتی تاڵیبان رایگەیاند، کابول پێشوازی لە وەبەرهێنانی ئەمریکا دەکات لە کەرتەکانی کانزا، ژێرخان، کشتوکاڵ و بازرگانیدا.
مەزەندە دەکرێت ئەفغانستان خاوەنی زیاتر لە یەک تریلیۆن دۆلار سامانی کانزایی بێت کە بە زۆری تاوەکو ئێستا دەستکاری نەکراون و دەرهێنراون، لەوانەش کانزاکانی وەکو مس، لیسیۆم، کۆباڵت و زێڕ.
ئەم دەسپێشخەرییەی تاڵیبان لە کاتێکدایە کە گرووپەکە هەوڵدەدات کۆتایی بە گۆشەگیرییە دیپلۆماسییەکانی بهێنێت، سەرەڕای ئەوەی بەهۆی سەپاندنی سنووردارکردنی تووند بەسەر مافەکانی ژنان و کچان، رووبەڕووی رەخنەی تووندی نێودەوڵەتی بووەتەوە.
لەلایەکی دیکەوە، دۆناڵد ترەمپ، سەرۆکی ئەمریکا تاوەکو ئێستا ئارەزوویەکی کەمی بۆ نزیکبوونەوە لەگەڵ تاڵیبان نیشان داوە؛ بەڵکو لە جیاتی ئەوە داوای گەڕاندنەوەی بنکەی ئاسمانیی باگرام دەکات بۆ ژێر دەستی ئەمریکا، کە ئەوەش داواکارییەکە تاڵیبان بە تووندی رەتی دەکاتەوە.
ئابی 2021 تاڵیبان سەرکەوتوو بوو لە رووخاندنی حکومەتی پێشووی وڵاتەکەی ئەمەش دوای کشانەوەی هێزەکانی ئەمریکا لەو وڵاتەدا. هەمان ساڵ گرووپەکە حکومەتێکی نوێی پێکهێنا و تەنیا لەلایەن رووسیاوە دانیپێدانراوە.
