رووداو دیجیتاڵ
وەزارەتی ناوخۆی بەریتانیا (هۆم ئۆفیس) رایگەیاند، ژمارەی پەڕینەوەی کۆچبەران لە رێگەی بەلەمە بچووکەکانەوە لە کەناڵی ئینگلیزی لە ماوەی مانگی ئابی ئەم ساڵدا، بۆ نزمترین ئاست دابەزیوە.
رۆژی هەینی، 4ـی ئەیلوولی 2026، وەزارەتی ناوخۆی بەریتانیا لە راگەیێندراوێکدا لە تۆڕی کۆمەڵایەتیی ئێکس رایگەیاند، ئاماری پەڕینەوەی کۆچبەران لە مانگی ئابی 2026ـدا بە رێژەی 46% بەراورد بە هەمان ماوەی پار (2025) دابەزیوە.
وەزارەتی ناوخۆی بەریتانیا ئاماژەی بەوە کرد، کۆی گشتیی گەیشتنی کۆچبەرانی نایاسایی بۆ خاکی بەریتانیا لەم ماوەیەدا گەیشتووەتە نزمترین ژمارە لە دوای ساڵی 2020ـەوە.
ئەم کەمبوونەوە بەرچاوەی هاتووچۆی بەلەمە بچووکەکان لە مانگی ئابدا (کە زۆرجار بەهۆی گونجاویی کەشوهەواوە لووتکەی پەڕینەوەی کۆچبەران بووە) بە سەرکەوتنێکی گەورە بۆ رێکارە ئەمنی و یاساییەکانی بەریتانیا ئەژمار دەکرێت.
بەپێی داتاکانی وەزارەتی ناوخۆی بەریتانیا، لە ساڵی 2025 نزیکەی 41,472 کۆچبەر لە رێگەی بەلەمی بچووکەوە پەڕیونەتەوە بۆ بەریتانیا. ئەمە دووەم بەرزترین ژمارە بوو لە دوای ساڵی 2022 (کە نزیکەی 45,774 کەس بوو).
ئەمە لەکاتێکدا لە ساڵی 2026 (تاوەکو سەرەتای ئەیلوول) نزیکەی 16,391 بۆ 16,513 کۆچبەر پەڕیونەتەوە.
دیاردەی پەڕینەوەی کۆچبەران لە رێگەی بەلەمە بچووکەکانەوە لە کەناڵی ئینگلیزی لە سنووری نێوان فەڕەنسا و بەریتانیا، یەکێکە لە گرنگترین دۆسیە سیاسی و ئەمنییەکانی لەندەن لە ساڵانی دواییدا.
لە ساڵی 2018ـەوە حکومەتی بەریتانیا دەستی بە تۆمارکردنی ئاماری فەرمیی ئەم پەڕینەوانە کردووە.
بەهۆی جێبەجێکردنی رێکاری تووندتر لەسەر سنوورەکان، هاوکاریی دەریایی لەگەڵ فەڕەنسا و هەوڵەکانی بەرەنگاربوونەوەی تۆڕەکانی قاچاخچێتی لە ساڵی 2026ـدا، بەریتانیا توانیویەتی ئاستی پەڕینەوەی کۆچبەران لە رێگەی ئاوەوە بە شێوەیەکی بەرچاو کەم بکاتەوە.
