کۆریای باکوور تاقیکردنەوەی چەکێکی "جۆری نوێ" بە سەرپەرشتیی کیم جۆنگ ئوون رادەگەیێنێت

رووداو دیجیتاڵ

میدیای فەرمیی کۆریای باکوور رۆژی سێشەممە بڵاویکردەوە، کیم جۆنگ ئوون، سەرۆکی ئەو وڵاتە سەرپەرشتیی تاقیکردنەوەی چەکێک لە "جۆرێکی نوێ" کردووە و جەختی لەوە کردووەتەوە کە ئەم تاقیکردنەوەیە رەنگدانەوەی پێشکەوتنی بەردەوامی تواناکانی سەربازیی وڵاتەکەیەتی.

ئەم راگەیاندنە دوو رۆژ دوای ئەوە هات کە هەریەک لە کۆریای باشوور و ژاپۆن ئاشکرایان کرد، پیۆنگیانگ دوو مووشەکی بالیستیی کورتمەودای بەرەو ئاوەکانی کەناراوەکانی رۆژهەڵاتی وڵاتەکەی هاویشتووە؛ هەنگاوێک کە لەلایەن هەردوو وڵاتەوە وەک هەڕەشەیەک بۆ سەر ئاسایش و سەقامگیریی ناوچەکە سەرکۆنە کرا.

ئاژانسی هەواڵی ناوەندیی کۆریای باکوور (KCNA) رایگەیاند، فەرمانگەی مووشەکیی کۆریای باکوور رۆژی یەکشەممە بە ئامادەبوونی کیم جۆنگ ئوون "بە سەرکەوتوویی جۆرێکی نوێی چەکی تاقیکردەوە."

پیۆنگیانگ وردەکاری و سروشتی چەکە نوێیەکەی ئاشکرا نەکرد، بەڵام ئاژانسەکە لە زاری کیمەوە بڵاویکردەوە کە ستایشی تاقیکردنەوەکەی کردووە و وەک "بەڵگەیەکی بەرچاو لەسەر تەکنەلۆجیای بەرگریی سەردەمیانە" ناوی بردووە.

ئاژانسەکە ئاماژەی بەوەش کرد کە کیم هۆشداریی داوە لەوەی ئەم توانایە دەبێتە هۆی تووشکردنی نەیارانی وڵاتەکەی بە "سەرئێشەیەکی بێچارەسەر و لێدانێکی کوشندە و حەتمی."

سەرۆکی کۆریای باکوور ئەم تاقیکردنەوەیەی گەڕاندەوە بۆ ئاستی ئامادەیی سەربازیی وڵاتەکەی و جەختی لەوە کردەوە کە هەبوونی ئەم جۆرە تەکنەلۆجیایە بۆ وڵاتەکەی گرنگییەکی زۆری هەیە بۆ "ئامادەیی وڵات بۆ جەنگ و پەرەپێدانی داهاتووی هێزە چەکدارەکان."

سیئۆل ئەو هەڵدانانەی بە پێشێلکردنی بڕیارەکانی ئەنجوومەنی ئاسایشی نەتەوە یەکگرتووەکان زانی و داوای لە پیۆنگیانگ کرد دەست لە چالاکییە مووشەکییە بالیستییەکانی هەڵبگرێت، هاوکات ژاپۆن ناڕەزایەتییەکی فەرمیی پێشکێش کرد و تاقیکردنەوەکانی بە هەڕەشە بۆ سەر ئاشتی و ئاسایشی ناوچەکە ناوبرد.