رووداو دیجیتاڵ
لە رۆژانی شەممە و یەکشەممە کە کۆتایی هەفتەیە لە ئەمریکا و هاوکات لەگەڵ ئاهەنگەکانی هالۆوین، چەندین رووداوی تەقەکردن لە شارە جیاوازەکان روویاندا، کە بەهۆیەوە چەندین کەس کوژران و دەیانی دیکەش بریندار بوون.
داڵاس، ویلایەتی تێکساس
پۆلیسی داڵاس رایگەیاند، لە گەڕەکی دیپ ئێلوم سێ رووداوی تەقەکردن روویانداوە، کە بەهۆیانەوە 4 کەس کوژراون و 15 کەسیش بریندار بوون. دانیێل کۆمۆ، بەرپرسی پۆلیسی شارەکە دەڵێت، تاوەکو ئێستا نازانن ئایا ئەم سێ رووداوە پەیوەندییان بەیەکەوە هەیە یان نا و هۆکاری دەستپێکردنیشیان روون نییە.
کۆمۆ گوتی: "رووداوەکە لە چەند شوێنێکی جیاواز بووە و شوێنێکی گەورەی گرتووەتەوە. ئێمە چەند کەسێکمان دەستگیرکردووە و ئێستا لێکۆڵینەوەیان لەگەڵ دەکەین بۆ ئەوەی بزانین چۆن تێوەگلاون." بەڵام ژمارەی دەستگیرکراوەکان و جۆری تۆمەتەکانی ئاشکرا نەکرد.
بێرمینگام، ویلایەتی ئەلاباما
شەوی شەممە، راستەوخۆ دوای تەواوبوونی یارییەکی ساڵانەی تۆپی پێی ئەمریکی لەنێوان دوو زانکۆی کۆن و ناسراوی رەشپێستەکان، زانکۆی ئەلاباما ستەیت و زانکۆی ئەلاباما ئەی ئەند ئێم، تەقەیەکی زۆر لە نزیک یاریگەکە کرا.
مایکل پیکێت، بەرپرسی پۆلیسی بێرمینگام گوتی، بەهۆی تەقەکردنەکەوە کەسێک کوژراوە و هەشتی دیکەش بریندار بوون. تەقەکردنەکە لەو شوێنە بووە کە دەستگێڕەکان شتومەکیان لێ دەفرۆشت، بەڵام خۆشبەختانە زۆربەی هاندەران و خێزانەکان یاریگەکەیان جێهێشتبوو، ئەگەرنا زیانەکان زۆر گەورەتر دەبوون.
نزیکەی 70 هەزار هاندەر ئامادەی ئەو یارییە مێژووییە بوون.
پۆلیس دەڵێت هێشتا هۆکاری تەقەکردنەکە نازانرێت، بەڵام کەسێکیان بۆ لێکۆڵینەوە دەستگیرکردووە و دەستیان بەسەر "چەندین چەک"ـیشدا گرتووە.
نیوارک، ویلایەتی دێلاوێر
کەمێک دوای کاژێر 11:10 خولەکی شەوی شەممە، لە نزیک کەمپی زانکۆی دێلاوێر شەش کەس بریندار کران و گوێزرانەوە بۆ نەخۆشخانە. لەو ڤیدیۆیانەی لە تۆڕە کۆمەڵایەتییەکان بڵاوکراونەتەوە، دەردەکەوێت خەڵک بۆ رزگارکردنی گیانی خۆیان رادەکەن. بەهۆی ئەم رووداوەوە شەقامی سەرەکیی شارەکە بۆ چەند کاژێرێک داخرا.
بلوومینگتن، ویلایەتی ئیلینۆی
بەرەبەیانی رۆژی یەکشەممە، لە نزیک زانکۆی ئیسلیانی ئیلینۆی تەقە کرا. بەهۆیەوە کچێکی تەمەن 19 ساڵ کوژرا و ژنێکی دیکەش بە سەختی بریندار بوو. شەش کەسی دیکەش بریندار بوون، بەڵام ژیانیان لە مەترسیدا نییە. بەڵام پۆلیس روونی نەکردووەتەوە ئایا ئەم شەش کەسە بە گوللە بریندار بوون یان بەهۆی راکردنەوە.
فەیێتڤیل، ویلایەتی ئارکنسا
هەر لە بەرەبەیانی رۆژی یەکشەممەدا، شەش کەس بەهۆی بەرکەوتنی گوللەوە رەوانەی نەخۆشخانە کران. پۆلیس دەڵێت، لێکۆڵینەوە سەرەتاییەکان نیشانی دەدەن کە پێش تەقەکردنەکە شەڕە قسە و دەمەقاڵێ روویداوە. تاوەکو ئێستاش کەس لەسەر ئەم رووداوە دەستگیر نەکراوە.
