رووداو دیجیتاڵ
دەسەڵاتی گواستنەوەی فیدراڵیی ئەڵمانیا (KBA) فەرمانی بە کۆمپانیای بی ئێم دەبلیو کرد کە زیاتر لە 330 هەزار ئۆتۆمبێل لە جیهاندا بکشێنێتەوە. ئەم بڕیارە بەهۆی دۆزینەوەی گرفتێکی تەکنیکییە کە دەکرێ ببێتە هۆی ئاگرکەوتنەوە لەنێو ئۆتۆمبێلەکەدا.
مۆدێلەکان و کێشە تەکنیکییەکە
بەپێی زانیارییەکانی (KBA)، کێشەکە لە شێوازی داڕشتن و تێپەڕاندنی وایەرەکانی نێو داشبۆردی ئۆتۆمبێلەکانە، کە رەنگە ببێتە هۆی دروستبوونی ئاگر.
ئەم کشاندنەوەیە ئەو مۆدێلانە دەگرێتەوە کە لە نێوان حوزەیرانی 2022 و کانوونی یەکەمی 2025 بەرهەمهێنراون:
- مۆدێلەکانی i5 و i7 (کارەبایی)
- مۆدێلەکانی زنجیرەی 5 و زنجیرەی 7
- مۆدێلی وەرزشیی M5
ئامارەکان و دۆخی سەلامەتی
کۆی گشتیی ئەو ئۆتۆمبێلانەی ئەگەری هەیە ئەم کێشەیان تێدابێت دەگاتە 337,000 دانە، کە 29,000یان لەنێو بازاڕەکانی ئەڵمانیادان.
تاوەکو ئێستا هیچ رووداوێکی ئاگرکەوتنەوە بەهۆی ئەم گرفتەوە تۆمارنەکراوە، بەڵام دەزگا چاودێرەکان وەک رێکارێکی پێشوەختە جەخت لەسەر کشاندنەوەی ئەو ئۆتۆمبێلانە دەکەنەوە.
ئەمە دووەمجارە لە کەمتر لە مانگێکدا ئەم براندە ئەڵمانییە فەرمانی کشاندنەوەی جیهانی بۆ دەردەچێت. لە سەرەتای ئەم مانگەشدا بەهۆی مەترسیی دروستبوونی پریشک لە (ستارتەر)ـی بزوێنەردا، بڕیاری کشاندنەوەی دەیان هەزار ئۆتۆمبێل درا.
ئەم کێشە تەکنیکییانە لە کاتێکدایە، کۆمپانیاکە لە کۆتایی ساڵی 2024دا رووبەڕووی گەورەترین پاشەکشە بووەوە، کاتێک ناچار بوو 1.5 ملیۆن ئۆتۆمبێل بەهۆی کێشەی (سیستمی برەیک)ـەوە بکشێنێتەوە.
.jpg&w=3840&q=75)
