رووداو دیجیتاڵ
لەگەڵ هاتنی مانگی موحەڕڕەم، شیعەکان لە قەزای شنگال، هاوشانی شوێنەکانی دیکە، دەست بە رێوڕەسمی یادکردنەوەی عاشورا دەکەن. بۆنەیەک کە ساڵانە لە یەکەمی مانگەوە دەست پێدەکات و تاوەکو 13ی موحەڕڕەم بەردەوام دەبێت. لەم ماوەیەدا، گەورە و بچووک جلی رەش دەپۆشن و بە شێوازی جیاواز ماتەمینی بۆ ئیمام حوسێن دەگێڕن.
یەکێک لە دیارترین دیمەنەکانی ئەم یادە، دانانی "مەوکبە"کانە، کە تێیدا خواردن و خواردنەوە بەبێ بەرامبەر پێشکەش بە بەشداربووان و رێبواران دەکرێت.
ئیبراهیم ساڵح، بەرپرسی مەزارگەی سەیدە زەینەب دەڵێت، "ئێمە دەست بە 'مەوکبە'کانمان دەکەین، خواردن و خواردنەوە پێشکەش دەکەین و پێشوازی لە میوانان دەکەین. تاوەکو رۆژی دەیەم، خواردنێک وەک خێری ئیمام حوسێن ئامادە دەکەین. رۆژی سێزدەیەمیش، کە رۆژی بەخاکسپاردنی ئیمام حوسێنە، خەڵک لە تەلەعفەر و دەشتی نەینەواوە بە پێ روو لە مەزارگەی سەیدە زەینەب دەکەن".
رێوڕەسمەکان بۆ ماوەی چل رۆژ تاوەکو "چلەی ئیمام حوسێن" درێژەیان دەبێت. لەم نێوەندەدا، ئافرەتانی شیعەش رۆڵێکی گرنگ و بەرچاو لە ئامادەکاری و بەڕێوەبردنی یادەکەدا دەگێڕن.
زینا غەسان، بەشداربووی یادەکانە و ئاماژە بەوە دەدات، "رۆژێک پێش عاشورا، ئێمە دێینە ئێرە، شوێنەکە پاک دەکەینەوە، خواردن دروست دەکەین و نوێژەکانمان دەکەین. شیوەن بۆ سەیدە زەینەب (سەلامی خوای لێبێت) دەگێڕین، خواردن ئامادە دەکەین و خزمەتی خەڵک دەکەین".
ئەم ساڵ لە سنووری شنگال، 15 مەوکبە لەسەر شەقام و شوێنە گشتییەکان دانراون و نزیکەی پێنج هەزار کەس بەشدارییان لە رێوڕەسمەکاندا کردووە. هاوکات پێشبینی دەکرێت کە تەنیا لە نێوان قەزای تەلەعفەر و شنگالدا، ژمارەی مەوکبەکان بگاتە نزیکەی 200 دانە، کە نیشانەی بەرفراوانیی ئەم بۆنە ئایینییەیە لە ناوچەکەدا.
