رووداو دیجیتاڵ
سیاسەتڤانی باکوری کوردستان لە قامشلۆی رۆژئاوای کوردستان سەردانی ئەنجوومەنی نیشتیمانی کورد لە سووریا (ئەنەکەسە)ی کرد. لە کۆبوونەوەکەدا هەردوولا جەختیان لە پێویستیی پابەندبوون بە ئەنجامەکانی کۆنفرانسی یەکڕیزی و هەڵوێستی کورد کردەوە.
سیاسەتڤانی کورد عوسمان بایدەمیر ئەمڕۆ 6ـی تشرینی دووەمی 2025، لە قامشلۆ سەردانی بارەگەی ئەنجوومەنی نیشتیمانی کورد لە سووریا (ئەنەکەسە)ی کرد و لەلایەن هەریەک لە بەرپرسانی ئەنەکەسە، سلێمان ئۆسۆ، فەسڵا یوسف، فەیسەڵ یوسف و ژمارەیەک بەرپرسی دیکەوە پێشوازی لێکرا.
ئەنجوومەنی نیشتیمانی کورد لە سووریا (ئەنەکەسە) لەبارەی سەردانەکەی عوسمان بایدەمیر راگەیەندراوێکی بڵاوکردەوە.
بەگوێرەی راگەیەندراوەکە، لە کۆبوونەوەکەدا دۆخی گشتیی کوردان لە رۆژئاوا و باکووری کوردستان هەڵسەنگێندرا و جەخت لە گرنگیی بەهێزکردنی یەکڕیزی کورد و رووبەڕووبوونەوەی کێشەکان کرایەوە.
هەروەها هەردوولا جەختیان لە پێویستیی پابەندبوون بە ئەنجامەکانی کۆنفرانسی یەکڕیزی و هەڵوێستی کورد کردەوە، کە ئامانج لێی یەکخستنی هەڵوێستی کورد و نزیککردنەوەی تێڕوانینەکان بوو لەنێوان هێزە سیاسییە جیاجیاکانی رۆژئاوای کوردستاندا.
لە کۆبوونەوەکەدا باس لە رێگەکانی بەرەوپێشبردنی پەیوەندییەکانی نێوان هێز و لایەنە جیاوازەکانی کورد و کارکردن بۆ نەهێشتنی ئاڵنگارییەکانی بەردەم بەدیهێنانی ئەو ئامانجە هاوبەشە کرا.
عوسمان بایدەمیر، سیاسەتڤانی کورد رۆژێک بەر لە سەردانیکردنی ئەنەکەسە، 5ـی 11ـی 2025 سەردانی بارەگەی سەرەکی پارتی یەکێتی دیموکراتی (پەیەدە) کرد و لەگەڵ پەروین یوسف، هاوسەرۆکی پەیەدە و بەرپرسانی پارتەکەدا کۆبووەوە.
