رووداو دیجیتاڵ
دوای کردنەوەی دەروازەی نێودەوڵەتیی پەروێزخان و بڕیاری بەردەوامبوونی هاتووچۆ لە دەروازەی باشماخ، گوتەبێژی دەروازەی نێودەوڵەتیی حاجی ئۆمەران دەڵێ، سبەی هاتووچۆی بازرگانی و گەشتیاری لە دەروازەکەیان دەست پێدەکاتەوە. سەرپەرشتیاری دەروازەی شووشمێش دەڵێ، دەروازەکەیان کراوەتەوە و بەڕێوەبەری گومرگی راپەڕینیش ئاماژە بەوە دەکات، دەروازەی کێلێ بەداخراوی ماوەتەوە.
ئەمڕۆ یەکشەممە 14ـی ئادار، دەرەوازەی حاجی ئۆمەران لە راگەیێندراوێکدا بازرگانان، کۆمپانیاکان، هاوردەکاران، ناردەکاران و هاووڵاتییانی ئاگادار کردەوە کە دەرەوازەکەیان لە سبەی یەکشەممەوە کراوە دەبێ.
سیروان حوسێن، گوتەبێژی دەروازەی حاجی ئۆمەران، ئەمڕۆ شەممە بە تۆڕی میدیایی رووداوی گوت: "هەموو ئامادەکارییەکمان هەیە بۆ کردنەوەی دەروازەکە و لە دیوی ئێرانیشەوە ئامادەکاری کراوە و سبەی بە فەرمی دۆخەکە ئاسایی دەبێتەوە".
لە دەستپێکی جەنگی ئەمریکا و ئیسرائیل لەگەڵ ئێران لە 28ی مانگی رابردوو، دەروازەی نێودەوڵەتیی حاجی ئۆمەران لە پارێزگای هەولێر و دەروازەی پەروێزخان لە پارێزگای سلێمانی داخران، 11ـی ئادار دەروازەی پەروێزخان کرایەوە.
لە راگەیێندراوەکەی ئەمڕۆ شەممەی دەروازەکەدا هاتووە: "دەروازەی نێودەوڵەتیی حاجی ئۆمەران لەگەڵ دەروازەی گومرگیی تەمەرچینی ئێران[دیوی ئێرانی دەروازەکە] بە رووی هاتووچووی گەشتیاری و بازرگانییەوە دەکرێتەوە و وەکو پێشتر ئاسایی دەبێتەوە".
دوای دەستپێکردنی جەنگ، تەنیا دەروازەی نێودەوڵەتیی کراوە لەنێوان هەرێمی کوردستان لەگەڵ ئێران و رۆژهەڵاتی کوردستان، دەروازەی باشماخ بوو لە پارێزگای سلێمانی.
مەریوان حەسەن، گوتەبێژی دەروازەی باشماخ بە رووداوی گوت، دەروازەکەیان کراوە بووە و ئاڵۆگۆڕی بازرگانی تێدا رانەگیراوە.
عەباس عەزیز باپیر، بەڕێوەبەری گومرگی ئیدارەی سەربەخۆی راپەڕین لە پارێزگای سلێمانی، ئەمڕۆ شەممە بە تۆڕی میدیایی رووداوی گوت: "دەروازەی کێلێ لە سەرەتای جەنگەوە داخراوە و تاوەکو ئێستا نەکراوەتەوە".
لە سنووری پارێزگای هەڵەبجە دەروازەی شووشمێ هەیە کە دەکەوێتە سنووری هەورامان.
حەمید بارام، بەڕێوەبەری ناحیەی بیارە، ئەمڕۆ شەممە بە تۆڕی میدیایی رووداوی گوت: "دەروازەکەمان بە رووی بازرگانی و گەشتیاریدا کراوەیە. سەرەتای جەنگ چەند رۆژێک داخرا و دواتر کرایەوە".
.jpg&w=3840&q=75)
