رووداو دیجیتاڵ
چەند کەسێک لە گەڕەکێکی کەرکووک، هێرش دەکەنە سەر فەلاح یایچی، قایمقامی بەوەکالەتی قەزای ناوەندی شارەکە و برینداری دەکەن.
نزیکەی کاژێر 02:30ی دوانیوەڕۆی ئەمڕۆ شەممە، لیژنەیەکی لابردنی زێدەڕۆیی کە قایمقامی کەرکووک سەرپەرشتی دەکات، بە شۆفڵ و گەڵابە دەچنە گەڕەکی خەزرا بۆ رووخاندنی هەندێک خانوو کە بەپێی زانیاریی پەیامنێری رووداو، خانووەکان بەشێوەی زێدەڕۆ دروستکراون و پێشتر ئاگادارکرابوونەوە کە دەبێت بڕووخێنرێن، بەڵام لەگەڵ گەیشتنی لیژنەکە و رووخاندنی خانووەکان، خەڵکی شوێنەکە رووبەڕووی لیژنەکە دەبنەوە.
هیوا حوسامەدین، پەیامنێری رووداو لە کەرکووک رایگەیاند، "پۆلیس چەند گولـلەیەکی بە ئاسماندا تەقاندبوو بۆ ئەوەی خەڵکەکە نزیکی قایمقام نەبنەوە، بەڵام خەڵکەکە بە دار و بەرد لە سەر و قۆڵی قایمقامیان داوە و برینداریان کردووە."
بە گوتەی پەیامنێری رووداو، "ئێستا قایمقام لە نەخۆشخانەی گشتیی کەرکووکە؛ چارەسەری پزیشکی بۆ دەکرێت و تەندروستیی جێگیرە."
فەلاح یایچی، قایمقامی ناوەندیی کەرکووک بەوەکالەت لە دوای 16ی ئۆکتۆبەری 2017ـەوە، بووەتە قایمقامی قەزای ناوەندیی کەرکووک و رۆژی 16ی ئەم مانگە و لە رێککەوتنی ئاڵوگۆڕی پۆستی پارێزگاری کەرکووک و پۆستەکانی دیکە، پۆستەکەی لێ وەردەگیرێتەوە و ئاڤێستا شێخ محەممەد لە شوێنی ئەو دەبێتە قایمقام.
.jpg&w=3840&q=75)
