رووداو دیجیتاڵ
هاوسەرۆکی کاروباری ئاوارە و پەنابەرانی بەڕێوەبەریی خۆسەر رایگەیاند، دوای هێرشەکانی سوپای عەرەبیی سووریا و گرووپە چەکدارەکان بۆ سەر تەبقە، رەققە و گوندەوارەکانی رۆژهەڵاتی دێرەزوور، کەمپەکانی ئاوارەکان لەو ناوچانە چیدیکە لەژێر سەرپەرشتیی بەڕێوەبەریی خۆسەردا نەماون.
ئەمڕۆ دووشەممە، شێخمووس ئەحمەد، بە تۆڕی میدیایی رووداوی راگەیاند، کەمپی ئاوارەکانی عەفرین و کەمپی ئەلتوێحینە لە تەبقە، کەمپە نافەرمییەکان لە رەققە، کەمپی ئەبوو خەشەب لە دێرەزوور و کەمپی عەریشە (40 کیلۆمەتر لە باشووری حەسەکە) لەژێر سەرپەرشتیی بەڕێوەبەریی خۆسەر نەماون.
هاوسەرۆکی کاروباری ئاوارە و پەنابەرانی بەڕێوەبەریی خۆسەر رایگەیاند، ئێستا تەنیا 6 کەمپی ئاوارەکان لەژێر سەرپەرشتیی ئەواندا ماونەتەوە.
ئەو کەمپانەی کە لەژێر سەرپەرشتیی بەڕێوەبەریی خۆسەردا ماونەتەوە بریتین لە: کەمپی هۆل، هەردوو کەمپی سەرێکانی و واشۆکانی لە حەسەکە، کەمپی تل سەمن لە نزیک کۆبانی (سەر بە پارێزگای رەققە کە ئاوارەکانی گرێ سپی تێیدا نیشتەجێن)، هەروەها هەردوو کەمپی رۆژ و نەورۆز لە ناوچەی دێریک.
