حەج و عومرە: بەهۆی حەجەوە پێدانی ڤیزەی عومرە رادەگیرێت

کاروان ستونی، گوتەبێژی حەج و عومرەی هەرێمی کوردستان، ئەمڕۆ پێنجشەممە بە تۆڕی میدیایی رووداوی گوت: "سبەی 20ـی ئادار دوایین رۆژی پێدانی ڤیزەی عومرە دەبێت لەلایەن سعودیەوە".

گوتەبێژی بەڕێوەبەرایەتی حەج و عومرە گوتی: "گەشتی ئاسمانی بەهۆی جەنگەوە نەماوە و ڤیزەی کەمیش دراوە، بەڵام هێشتا کەسانێک هەن لە رێگەی وشکانییەوە گەشتی عومرە دەکەن".

ستوونی دەڵێت: "ئەوانەی پێشتر ڤیزەیان وەرگرتووە و گەشتیان نەکردووە، دوایین وادە بۆ چوونە ناو خاکی  سعودیە 3ـی نیسانە".

گوتەبێژی بەڕێوەبەرایەتی حەج و عومرە ئاماژەی بەوە کرد، 18ـی نیسان دوایین رۆژی وەرزی عومرەیە و نابێت هیچ عومرەکارێک دوای ئەو کاتە لە سعودیە بمێنێتەوە.

کاروان ستوونی گوتی، رێکارەکانی بەڕێوەچوونی حەجی ئەم ساڵ وەکو خۆیان بەڕێوەدەچن و بەهۆی جەنگەوە هیچ بڕیارێک نەدراوە.