نەورۆز لە ئاکرێ پیرۆز دەکرێ و مەشەخەڵێکی گەورە هەڵدەکرێ

نەورۆزی قەزای ئاکرێ لە پارێزگای دهۆک نێوبانگی لە کوردستان و دەرەوەش هەیە، بەهۆی سرووشتی ناوچەکە و گرنگیدانی بە جەژنی نەورۆز، ئەو شارە بە "پایتەختی نەورۆز" ناودەبرێت.

دلاوەر بۆزۆ، قایمقامی قەزای ئاکرێ، ئەمڕۆ هەینی بە تۆڕی میدیایی رووداوی گوت: "بەهۆی دۆخی ئەمنی و بۆ پاراستنی هاونیشتمانییان و گەشتیاران رامانگەیاندبوو رێوڕەسمی فەرمی ناکەین، بەڵام خەڵکێکی زۆر زۆر هاتوونەتە ئاکرێ بۆ نەورۆز".

قایمقامی ئاکرێ گوتی: "خەڵک خۆیان هاتوون و دەهۆڵ و زووڕنایان هێناوە و شایی و هەڵپەڕکێ دەکەن و جەژنی نەورۆز پیرۆز دەکەن. ئێمەش ئاگری نەورۆز دەکەینەوە".

دلاوەر بۆزۆر گوتی، هەموو رێکارێکیان بۆ رێوڕەسمی فراوانی نەورۆز ئامادە کردبوو، بەڵام بەهۆی دۆخەکەوە رایانگرت؛ گوتیشی: "هەشت گرووپمان هەبوون مەشخەڵ هەڵبکەن و بچنە چیا، بەڵام ئێستا تەنیا دوو گرووپمان بە مەشخەڵەوە دەچنە چیا".

قایمقامی ئاکرێ ئاماژەی بەوەکرد، ئەگەر باران رێگر نەبێ، "گەورەترین مەشخەڵ ئامادەیە لە چیا هەڵبرکێ، هێندە گەورە و بەرزە پێدەچێت لە شاری هەولێریشەوە ئاگرەکەی ببینرێت".

دلاوەر بۆزۆر گوتی: "ئێستا خەڵکێکی زۆر خۆویستانە هاتوون و ئاهەنگگێڕانی نەورۆز بە شایی و هەڵپەڕکێ پیرۆز دەکەن".

قایمقامی ئاکرێ ئاماژەی بەوەشکرد، تەقاندنی یاری ئاگرین قەدەخەیە و بە هیچ کەس رێگەی پێنادرێ.