رووداو دیجیتاڵ
لە ئەنجامی تەقینەوەی بۆمبێک لەکاتی هەڵگرتنەوەیدا لەبەردەم ماڵی سەرکردەیەکی حەشدی شەعبی لە کەرکووک، پۆلیسێک گیانی لەدەستدا و بەرپرسەکەی حەشد و دوو کەسی دیکە بریندار بوون.
هەردی محەممەد، پەیامنێری رووداو لە کەرکووک بەدواداچوونی کردووە و دەڵێ: "بۆمبەکە لەبەردەم ماڵی سەرکردەیەکی حەشدی شەعبی بەناوی عەلی جەعفەر دانراوە و لەکاتی هەڵگرتنەوەیدا لەلایەن پۆلیسەوە تەقیوەتەوە".
رووداوەکە ئەمڕۆ چوارشەممە 25ـی ئادار روویداوە. بەگوێرەی زانیارییەکانی پەیامنێری رووداو، دوای ئاگادارکردنەوەی پۆلیس و دەزگا ئەمنییەکانی کەرکووک لە هەبوونی بۆمبەکە، تیمێک چوون بۆ هەڵگرتنەوەی، بەڵام لەو کاتەدا بۆمبەکەیان پێدا تەقیوەتەوە.
لە ئەنجامی تەقینەوەکە پۆلیسێک کە کوردە و کاکەییە بە ناوی (م. س) گیانی لەدەستداوە، هەروەها عەلی جەعفەر، سەرکردەکەی حەشدی شەعبی، پۆلیسێک و کارمەندێکی شارەوانی کە لەو ناوچەیە بووە بریندار بوون.
بریندارەکان رەوانەی فریاکەوتن کراون و هێزە ئەمنییەکان پەڕاوی لێکۆڵینەوەیان بۆ رووداوەکە کردووەتەوە.
.jpg&w=3840&q=75)
