رووداو دیجیتاڵ
بەگوێرەی راگەیێندراوێکی وەزارەتی خوێندنی باڵا، کاتی مانەوەی خوێندکارانی هەرێمی کوردستان کە لە ئێران دەخوێنن تاوەکو 15ـی نیسان درێژکرایەوە. گوتەبێژی وەزارەتەکە دەڵێت: "هیچ خوێندکارێک نەماوە لە ئێران گیری خواردبێ و هەموویان گەڕاونەتەوە".
عەباس ئەکرەم، گوتەبێژی وەزارەتی خوێندنی باڵا و توێژینەوەی زانستیی هەرێمی کوردستان، ئەمڕۆ هەینی بە تۆڕی میدیایی رووداوی گوت: "دووەم جارە کاتی مانەوەیان درێژ دەکرێتەوە، ئەویش بە هۆکاری دۆخی جەنگ و بۆ پاراستنی ژیانی خوێندکارانە".
گوتەبێژی وەزارەتی خوێندنی باڵا گوتیشی: "بە فەرمانی وەزیر، مانەوەی خوێندکاران لە هەرێمی کوردستان و نەگەڕانەوەیان، لەکاتی هاوتاکردندا بە ئامادەبوو بۆیان هەژمار دەکرێت".
بە گوتەی عەباس ئەکرەم، هەموو خوێندکارانی هەرێمی کوردستان کە لە ئێران دەخوێنن گەڕاونەتەوە و هیچ کەسێک لەو وڵاتە گیری خواردووە، چونکە سنوور کراوە بووە.
لە نووسراوەکەی وەزارەتی خوێندنی باڵادا هاتووە: بەهۆی بەردەوامیی بارودۆخی شەڕ و ناسەقامگیری ناوچەکە، لە پێناو پاراستنی گیانی ئەو قوتابی و خوێندکارانەی هەرێمی کوردستان کە لە زانکۆکانی کۆماری ئیسلامیی ئێران دەخوێنن، بە بڕیاری د. ئارام محەممەد قادر، وەزیری خوێندنی باڵا و توێژینەوەی زانستی بڕیاردرا بە:
1- درێژکردنەوەی ماوەی مانەوەیان لە هەرێمی کوردستان لە 28-03-2026 بۆ 15-04-2026.
2- لە دوای ئەم رێککەوتە، وەزارەت جارێکی دیکە هەڵسەنگاندن بۆ دۆخەکە دەکات و بڕیار و رێنمایی گونجاو دەردەکات.
3- ئەو ماوەیەیان بە مانەوە بۆ هەژمار دەکرێت و دواتر کێشەی یەکسانکردنی بڕوانامەیان نابێت.
.jpg&w=3840&q=75)
