رووداو دیجیتاڵ
رۆژی چوارشەممە، دوو فڕۆکەی بێفڕۆکەوانی ئێرانی لە نزیک فڕۆکەخانەی نێودەوڵەتیی دووبەی کەوتنە خوارەوە و لە ئەنجامدا چوار کەس بریندار بوون. هاوکات ئیسرائیل هێرشە ئاسمانییەکانی بۆ سەر تاران و لوبنان چڕتر کردەوە و زیانی گیانی و مادی لێکەوتەوە.
هێرش بۆ سەر دووبەی و کەنداو
نووسینگەی راگەیاندنی دووبەی بڵاویکردەوە، هێرشی فڕۆکە بێفڕۆکەوانەکان بووەتە هۆی برینداربوونی دوو هاووڵاتیی گانایی، هاووڵاتییەکی بەنگلادیشی و هاووڵاتییەکی هیندستانی. سەرەڕای هێرشەکە، گەشتە ئاسمانییەکان لە فڕۆکەخانەی نێودەوڵەتیی دووبەی، کە قەرەباڵخترین فڕۆکەخانەی جیهانە، بەردەوامن.
لە لایەکی دیکەوە، سوپای بەریتانیا بڵاویکردەوە، لە تەنگەی هورمز لە کەناراوەکانی عومان، هێرش کراوەتە سەر کەشتییەکی بارهەڵگر و ئاگری گرتووە، بەو هۆیەوە ستافی کەشتییەکە ناچار بوون جێی بهێڵن.
هاوکات کوێت بڵاویکردەوە، هەشت فڕۆکەی بێفڕۆکەوانی ئێرانیی خستووەتە خوارەوە. سعودیەش پێنج فڕۆکەی دیکەی لە نزیک کێڵگەی نەوتیی شەیبە تێکشکاندووە.
هێرشکردنە سەر تاران و لوبنان
ئیسرائیل جارێکی دیکە هێرشی کردەوە سەر تاران و لوبنان. لە بەیرووتی پایتەختی لوبنان، باڵەخانەیەک لە گەڕەکی (عایشە بەکار) ئاگری گرت.
وەزارەتی تەندروستیی لوبنانیش رایگەیاند، لە هێرشەکانی رۆژی چوارشەممەدا لە ناوچەکانی نەبەتییە، سور و بنت جوبەیل چەند کەسێک کوژراون.
ژمارەی کوژراوان لە لوبنان لە سەرەتای ئەم جەنگەوە گەیشتووەتە نزیکەی 500 کەس.
کاریگەریی لەسەر بازاڕی نەوت
ئێران هاتووچۆی کەشتییەکانی لە تەنگەی هورمزدا سنووردار کردووە، کە پێنجیەکی نەوتی جیهانی پێدا تێدەپەڕێ.
بەهۆی ترس لە پەککەوتنی هەناردەی وزە، نرخی نەوتی برێنت لە سەرەتای جەنگەکەوە 20% بەرزبووەتەوە.
سوپای ئەمریکاش دەڵێ، دوێنێ 16 بەلەمی ئێرانی لە گەرووی هورمز تێکشکاندووە.
زیانە گیانییەکان
بەپێی ئامارەکان، تاوەکو ئێستا زیاتر لە 1,300 کەس لە ئێران، 500 کەس لە لوبنان و 12 کەس لە ئیسرائیل کوژراون.
سوپای ئەمریکاش گیانلەدەستدانی حەوت سەرباز و برینداربوونی هەشت سەربازی دیکەی راگەیاندووە.
بەهۆی خراپیی دۆخی ئەمنیی ناوچەکەش، دەیان هەزار هاووڵاتیی بیانی لە وڵاتانی کەنداو چوونەتە دەرەوە.
.jpg&w=3840&q=75)
