ترەمپ: با ئەو وڵاتانەی تەنگەی هورمز بەکاردەهێنن، خۆیان بیپارێزن

رۆژی چوارشەممە، 18ـی ئاداری 2026، ترەمپ لە هەژماری فەرمیی خۆی لە تۆڕی کۆمەڵایەتیی (ترووس سۆشیاڵ) نووسیویەتی، ویلایەتە یەکگرتووەکانی ئەمریکا پێویستی بەو تەنگەیە نییە -کە شاخوێنی گواستنەوەی نەوتی جیهانە- و گوتی: "با ئەو وڵاتانەی بەکاری دەهێنن" خۆیان چارەسەرێک بدۆزنەوە.

هاوپەیمانە نەریتییەکانی ئەمریکا لە ئەورووپا و ئاسیا، داواکارییەکانی ترەمپیان بۆ ناردنی کەشتی و کەرەستەی سەربازیی دیکە بۆ پاککردنەوەی تەنگەکە رەتکردووەتەوە. ئێران وەک وەڵامێک بۆ جەنگی سێ هەفتەییی ئەمریکا و ئیسرائیل، هاتووچۆی لەو رێڕەوەدا پەکخستووە.

سەرۆکی ئەمریکا لەم چەند رۆژەدا زنجیرەیەک لێدوانی دژبەیەکی لەسەر تەنگەی هورمز داوە؛ جارێک دەڵێت دەبێت هاوپەیمانەکان هاوکاریی ئەمریکا بکەن و رۆژی سێشەممەش گوتی: "پێویستمان بە هیچ هاوکارییەک نییە." دوایین پەیامیشی ئاماژەیە بۆ ئەوەی کە رەنگە واشنتن بە تەواوی دەست لە پاراستنی ئەو ناوچەیە هەڵبگرێ و لێکەوتەکانی بۆ وڵاتانی دیکە جێبهێڵێت.

ترەمپ نووسیویەتی: "دەپرسم چی روودەدات ئەگەر ئەوەی لە 'دەوڵەتی تیرۆریستیی ئێران' ماوەتەوە کۆتایی پێ بهێنین و ئەو وڵاتانەی تەنگەکە بەکاردەهێنن -نەک ئێمە- بەرپرسیارێتیی ئەو شوێنەی پێی دەگوترێت 'تەنگە' هەڵبگرن؟ ئەوە هەندێک لە هاوپەیمانە بێدەنگەکانمان دەخاتە جووڵە، ئەویش بە خێرایی!!!"

تاران هەوڵ دەدات کۆنترۆڵکردنی ئەم رێڕەوە وەک کارتی گوشار دژی هێرشە چڕەکانی ئەمریکا و ئیسرائیل بەکاربهێنێت، کە تاوەکو ئێستا هەزاران ئامانجیان لەنێو ئێران پێکاوە، هێزی دەریایی ئەو وڵاتەیان تێکشکاندووە و سەرکردە باڵاکانیشیان کوشتوون.

هەرچەندە تەنیا ژمارەیەکی کەم لە کەشتییە بازرگانییەکان لەلایەن ئێرانەوە کراونەتە ئامانج، بەڵام هەڕەشەکە بەس بووە بۆ پەکخستنی هاتووچۆی دەریایی و بەرزبوونەوەی نرخی نەوت لە سەرانسەری جیهان. 

سوپای ئەمریکا درەنگانی رۆژی سێشەممە رایگەیاند، بۆمبی قورسی دژە حەشارگەی بۆ لێدانی پێگە مووشەکییەکانی ئێران لە کەناراوەکانی نزیک تەنگەی هورمز بەکارهێناوە.