سوپای ئیسرائیل: ئێران 400 مووشەکی بالیستی ئاراستە کردووین؛ 92%مان خستوونەتە خوارەوە

بە گوتەی شۆشانی، توانیویانە "رێژەیەکی نایاب لە تێکشکاندنی مووشەکەکان تۆمار بکەین کە دەگاتە نزیکەی 92% و تەنیا لە 4 شوێندا مووشەکەکان بەر زەوی کەوتوون." ئاماژەی بەوەش کرد کە ئەو مووشەکە بالیستییانەی ئێستا دەیانبینن، هیچ جیاوازییەکیان نییە لەگەڵ ئەوانەی پێشتر خستوویانەتە خوارەوە و لە داهاتووشدا بەردەوام دەبن لە تێکشکاندنیان.

سەرەڕای لێدوانی سوپا، شەوی شەممە دوو مووشەکی ئێرانی توانییان سیستمی بەرگری تێپەڕێنن و بە سەختی شاری عەراد و شاری دیمۆنای نزیکی، کە دامەزراوەیەکی ئەتۆمیی ئیسرائیلی لێیە، بپێکن.

بەپێی ئاماری دەزگای فریاکەوتنی ئیسرائیل، بەهۆی ئەو دوو هێرشەوە زیاتر لە 100 کەس بریندار بوون و زیانێکی گەورە بەر گەڕەکە سڤیلنشینەکان کەوتووە.

تەلەڤزیۆنی فەرمیی ئێران رایگەیاند کە لێدانی دیمۆنا "وەڵامێک" بووە بۆ هێرشی پێشتری ئیسرائیل بۆ سەر دامەزراوەی ئەتۆمیی نەتەنز لە ئێران.

شاری دیمۆنا کە دەکەوێتە بیابانی نەقەب، کارگەیەکی سەرەکیی ئەتۆمیی تێدایە. ئیسرائیل بە فەرمی دەڵێت تەنیا بۆ توێژینەوەیە و هەرگیز دانی بە هەبوونی چەکی ئەتۆمیدا نەناوە، بەڵام پەیمانگەی ستۆکهۆڵم بۆ توێژینەوەی ئاشتی (SIPRI) دەڵێت ئیسرائیل 90 کڵاوەی ئەتۆمی هەیە.

رێکخراوی تەندروستیی جیهانی (WHO) و ئاژانسی نێودەوڵەتیی وزەی ئەتۆم (IAEA) هۆشداریی تووندیان لە بەئامانجگرتنی بنکە ئەتۆمییەکان داوە.

بنیامین نەتەنیاهوو، سەرۆکوەزیرانی ئیسرائیل دانی بەوەدا نا کە "شەوێکی زۆر قورس بووە لەو شەڕەی کە بۆ داهاتوومان دەیکەین."

رۆژی یەکشەممە لە سەردانی شاری عەراددا، نەتەنیاهوو هەڕەشەی کرد: "رژێمی ئێران و سوپای پاسداران دەکەینە ئامانج. خۆیان، سەرکردەکانیان، دامەزراوەکانیان و سەرچاوە ئابوورییەکانیان دەپێکین."

دواتر لە کاتی سەردانی دیمۆنا، نەتەنیاهوو گوتی: "تەواوی وڵات بووەتە هێڵی پێشەوەی جەنگ" و داوای لە خەڵک کرد هەرکاتێک زەنگی ئاگادارکردنەوە لێیدا، بچنە پەناگەکانەوە.

رۆژی یەکشەممە، زەنگی ئاگادارکردنەوە لە ئیسرائیل بەردەوام بوو. میدیای ئیسرائیل بڵاویکردەوە، لانیکەم 6 هێرشی درۆن و مووشەک هەبوون و دوو کەسیش لە تەلئەڤیڤ بریندار بووە.

بەهۆی ئەم دۆخەوە، دەسەڵاتدارانی ئیسرائیل رێکارەکانی پاراستنیان تووندتر کردووە؛ گردبوونەوەی خەڵک لە 50 کەس زیاتر قەدەخەیە (بەو مەرجەی پەناگە نزیک بێت)، هەروەها رۆژانی یەکشەممە و دووشەممە سەرجەم قوتابخانەکان لە سەرتاسەری وڵات داخران.

لە کاتێکدا رۆژی یەکشەممە سەرەتای هەفتەیە لە ئیسرائیل، رۆژنامە ناوخۆییەکان رەشبینن سەبارەت بە کۆتاییهاتنی خێرای جەنگەکە.

رۆژنامەی ئیسرائیل هەیۆم نووسیویەتی: "تەنانەت ئەگەر راستیش بێت کە ئیسرائیل سەرکەوتنی زۆری لە بەرەکانی ئێران و لوبنان بەدەستهێناوە، رەنگە وڵاتەکە تووشی 'جەنگی لێچۆڕین' بێت بێ ئەوەی ئامانجەکانی بپێکێت، چونکە دووژمنە ئێرانییەکەمان ئێستا تەنیا شەڕی مانەوە دەکات."