رووداو دیجیتاڵ
گوتەبێژی رێکخراوی وزەی ئەتۆمی ئێران رەخنەی تووند لە بێدەنگیی ئاژانسی نێودەوڵەتیی وزەی ئەتۆم دەگرێت بەرامبەر هێرشەکان بۆ سەر دامەزراوە ئەتۆمییەکانی وڵاتەکەی و دەڵێت، 12 نامەیان بۆ ناردوون و وەڵامیان نییە.
بەهرۆز کەمالوەندی، جێگری سەرۆک و گوتەبێژی رێکخراوی وزەی ئەتۆمی ئێران رایگەیاند، "چوار جار وێستگەی ئەتۆمیی بوشەهر بۆردوومانکراوە، بەڵام هیچ زیانێکی گیانی و دزەکردنی ماددە تیشکدەرەکان نییە. دامەزراوەکانی نەتەنز و ئەردەکانیش سەلامەتن."
کەمالوەندی بە تووندی هێرشی کردە سەر رافایێل گرۆسی، بەڕێوەبەری گشتیی ئاژانسی نێودەوڵەتی وزەی ئەتۆم و گوتی، "پێویست بوو گرۆسی داوای کۆبوونەوەی بەپەلەی ئاژانسەکە بکات، بەڵام بێدەنگیی ئەو وەک جۆرێکە لە دەستهەبوون لەو کارانە."
کەمالوەندی هەروەها باسی لەوەش کرد، تاران تاوەکو ئێستا 12 نامەی فەرمیی بۆ ئاژانسەکە ناردووە و تێیدا ناڕەزایەتیی بەرامبەر بێدەنگی و بێکردەوەیی ئاژانسەکە دەربڕیوە.
گوتەبێژی رێکخراوی وزەی ئەتۆمی ئێران هۆشداریشیدایە وڵاتانی ناوچەکە لەبارەی لێکەوتەکانی بەردەوامیی هێرشەکان بۆ سەر دامەزراوە ئەتۆمییەکانی ئێران و دەڵێت، "ئەم دەستدرێژییانە پێشێلکارییەکی ئاشکرای یاسا نێودەوڵەتییەکانە، بەڵام بەهۆی هەژموونی سیاسی وڵاتانی رۆژئاوا بەسەر ئاژانسەکەدا، تاوەکو ئێستا هیچ هەڵوێستێکی بازدارندە وەرنەگیراوە."
کەمالوەندی ئاماژەی بەوەش کرد، قسەکانی ئەم دواییەی گرۆسی سەبارەت بە "تەماحی ئەتۆمیی" ئێران، قسەی "ناپیشەییانە و لایەنگرانەن" و نیشانەی ژێردەستەیی ئاژانسەکەیە بۆ ئەمریکا و ئیسرائیل.
