رووداو دیجیتاڵ
سوپای پاسدارانی ئێران لە راگەیێندراوێکدا هۆشدارییەکی تووند دەداتە ئەمریکا و داوا دەکات تەواوی بنکە و دامەزراوە پیشەسازییەکانیان لە ناوچەکەدا چۆڵ بکەن.
ئەمڕۆ شەممە، لە راگەیێندراوێکدا، سوپای پاسداران داوا لە دانیشتووانی دەوروبەری ئەو کارگە پیشەسازییانە دەکات کە ئەمریکا پشکی تێیاندا هەیە، بە زووترین کات ناوچەکان چۆڵ بکەن بۆ ئەوەی دووربن لە هەر زیانێکی گیانی.
سوپای پاسداران ئەم هەڕەشەیەی پاش ئەوە دەکات کە لە 48 کاژێری رابردوودا کارگە مەدەنییەکانی ئێرانیان کردووەتە ئامانج.
بەپێی راگەیێندراوەکە، "لەو هێرشانەدا ژمارەیەک کرێکار کە خەریکی کارکردن بوون، لە کاتێکدا بە رۆژوو بوون، گیانیان لەدەستداوە."
سوپای پاسداران دووپاتی دەکاتەوە کە ئەم هەنگاوەیان وەک وەڵامدانەوەیەکە بۆ ئەو هێرشانەی کراونەتە سەر کەرتی بەرهەمهێنانی وڵاتەکەیان.
شەڕی ئەمریکا و ئیسرائیل لەگەڵ ئێران لە 15یەمین رۆژدایە و هێرشەکان بەردەوامن. هەردوولا یەکدی بە تێکدانی سەقامگیری ئابووری و ئاسایشی ناوچەکە تۆمەتبار دەکەن.
