عێراقچی: ئەگەر هێرشەکان بۆ سەر ژێرخانی وڵاتەکەمان دووبارە ببنەوە، دان بەخۆگرتنمان نامێنێت

رۆژی پێنجشەممە، 19ی ئاداری 2026، عەباس عێراقچی، وەزیری دەرەوەی ئێران لە پێگەی تایبەتی خۆی لە تۆڕی کۆمەڵایەتیی ئێکس نووسی: "وەڵامدانەوەمان بۆ هێرشەکانی شەوی رابردووی ئیسرائیل کە کرابوونە سەر ژێرخانی وڵاتەکەمان، تەنیا بەشێکی کەم بوو لە هێزی ئێمە. تاکە هۆکاری ئەم دانبەخۆداگرتنە رێزگرتن بوو لە بانگەوازەکانی کەمکردنەوەی گرژییەکان."

عێراقچی گوتی: "ئەگەر هێرش بۆ سەر ژێرخانی وڵاتەکەمان دووبارە ببێتەوە، چی دیکە دان بەخۆگرتنمان نامێنیت."

عێراقچی ئاماژەی بەوەشکرد: "لە ئەگەری کۆتاییهاتنی شەڕ، دەبێت قەرەبووی ئەو زیانانە بکرێتەوە کە بەر ناوچە سڤیلنشینەکان کەوتووە."

رۆژی چوارشەممە، ئیسرائیل هێرشێکی ئاسمانیی کردە سەر دامەزراوەی پیشەسازیی نەوتی پارسی باشوور و عەسلەویەی ئێران. پارسی باشوور یەکێکە لە گەورەترین کێڵگەکانی گازی ئێران کە لە سنووری ئاوە هاوبەشەکانی نێوان ئێران و قەتەر هەڵکەوتووە.

بە گوتەی ئەسکەندەر پاسالار، قایمقامی عەسلەویە، لە ئەنجامی هێرشەکە چەند وێستگەیەکی بەرهەمهێنان لەکارکەوتن.

لەبەرامبەردا ئێران هێرشی کردە سەر دامەزراوەی گازی LNGـی قەتەر و چەند دامەزراوەیەکی دیکەی وزە لە وڵاتانی دیکەی کەنداو. دواتر دوناڵد ترەمپ، سەرۆکی ئەمریکا، هۆشدارییەکی تووندی دایە تاران و رایگەیاند، ئەگەر جارێکی دیکە هێرش بکرێتە سەر قەتەر، ئەمریکا گەورەترین کێڵگەی گازی ئێران بە تەواوەتی وێران دەکات.