موجتەبا خامنەیی: هێرشەکانی سەر تورکیا و عومان لەلایەن ئێران و بەرەی موقاوەمەوە نەکراون

موجتەبا خامنەیی لە بەشێکی پەیامەکەیدا ئاماژە بەوە دەکات کە لە ساڵی رابردووی هەتاویدا (21-3-2025 تاوەکو 21-3-2026) ئێران رووبەڕووی سێ جەنگ بووەوە. جەنگی یەکەم لە حوزەیرانی رابردوودا بوو کاتێک ئیسرائیل "بە هاوکاریی تایبەتیی ئەمریکا و لە نێوەڕاستی دانوستاندنەکاندا بە هێرشێکی نامرۆڤانە باشترین فەرماندە و زانایانی وڵاتەکەمان، هەروەها نزیکەی 1000 هاووڵاتی شەهید کرد". 

رێبەری کۆماری ئیسلامیی ئێران دەڵێ، "دووژمن" پێی وا بوو "سیستمی ئیسلامی" دەڕوخێت، بەڵام دوای ئەوەی بێ ئومێد بوو، ئیدی پەنای بۆ "نێوەندگیری و هەوڵدان بۆ راگرتنی شەڕ برد تاوەکو بە جۆرێک خۆی لە لێواری تیاچوون رزگار بکات".

موجتەبا خامنەیی دەڵێ، جەنگی دووەم بریتی بوو لە "کودەتا"ی کانوونی دووەمی ئەم ساڵ، واتە رۆژانی خۆپیشاندان لە ئێران و دەڵێ، "دووژمن لەرێگەی بەکرێگیراوانی خۆیانەوە تاوانێکی زۆریان ئەنجامدا و ژمارەیەکی زۆرتر لە هاووڵاتیمان بەراورد بە جەنگی پێشوو شەهیدکرد و زیانی زۆریان گەیاند".

رێبەری کۆماری ئیسلامیی ئێران ئاماژە بەوە دەکات، جەنگی سێیەم بریتییە لەو جەنگەی لە 28ی مانگی شوباتەوە هەڵگیرساوە و تاوەکو ئێستا بەردەوامە، کە لە یەکەم رۆژیدا عەلی خامنەیی، رێبەری کۆماری ئیسلامیی ئێران کوژرا و دەڵێ: "ئەم جەنگە دوای ئەوە هات کە دووژمن لە جووڵەی جەماوەری نائومێد بوو، بۆیە کەوتە نێو ئەو خەیاڵەی کە ئەگەر سەرکردایەتیی سیستمەکە و ژمارەیەک فەرماندەی کاریگەر شەهید بکات، ئەوە دەبێتەهۆی دروستکردنی ترس و نائومێدی لەنێو ئێوە و خەونی دابەشکردنی ئێران دەبێتە راستی".

موجتەبا خامنەیی رووی قسەکانی لە هاووڵاتییانی ئێرانە و دەڵێ: "بەڵام ئێوە لەم مانگە پیرۆزەدا، رۆژووگرتنتان لەگەڵ جیهاد تێکەڵ کرد و هێڵێکی بەرگریی بەرفراوانتان بە رووبەری وڵات و سەنگەرە قایمەکان لە مەیدان، گەڕەک و مزگەوتەکاندا دروست کرد، ئەمەش وای کرد دووژمن تووشی شۆک بێت و بکەوێتە گوتنی قسەی دژبەیەک و بێمانا کە نیشانەی نەمانی هۆشیاری و لاوازیی لێکدانەوەیەتی".

رێبەری کۆماری ئیسلامیی ئێران سوپاسی بەرپرسان و خەڵکی وڵاتەکەی دەکات و دەڵێ: "ئێستا بەهۆی ئەو یەکگرتووییە سەیرەی کە لەنێوان ئێوەدا دروست بووە، سەرەڕای جیاوازیی بیروباوەڕی ئایینی، فیکری، کولتووری و سیاسی، دووژمن تووشی داڕمان بووە. ئەمە نیعمەتێکی تایبەتە لە لایەن پەروەردگارەوە و دەبێت بە زمان و دڵ و لە کرداریشدا سوپاسگوزار بین". 

رێبەری کۆماری ئیسلامیی ئێران لە پەیامەکەیدا دەڵێ: "یەکێک لە رێگەکانی دووژمن، هەڵمەتی میدیاییە کە لەم رۆژانەدا بەتایبەتی مێشک و دەروونی خەڵک دەکاتە ئامانج بۆ ئەوەی زەبر لە یەکڕیزیی نیشتمانی و پاشان ئاسایشی نیشتمانی بووەشێنێت. دەبێت وریابین نەکا بەهۆی کەمتەرخەمیی خۆمانەوە ئەم مەبەستە شوومەی دووژمن بێتە دی". 

موجتەبا خامنەیی دەڵێ: "بۆیە پێشنیازم بۆ میدیا ناوخۆییەکان ئەوەیە، سەرەڕای هەموو جیاوازییە فیکری و سیاسییەکان، بە جیدی دوور بکەونەوە لە باسکردنی خاڵە لاوازەکان، چونکە ئەگەرنا، دووژمن دەگاتە ئامانجەکەی".

یەکێکی دیکە لەو خاڵانەی رێبەری کۆماری ئیسلامیی ئێران لەسەری دەوەستێت بریتییە لە دۆخی ئابووری و دەڵێ: "یەکێک لە هیوایەکانی دووژمن، سوودوەرگرتنە لە لاوازییە ئابووری و کارگێڕییەکان. رێبەرە شەهیدەکەمان لە ساڵانی جیاوازدا درووشمی ساڵی بۆ ئابووری تەرخان کردبوو. بە بڕوای منیش، دابینکردنی بژێویی خەڵک و باشکردنی ژێرخانی ژیان و خۆشگوزەرانی و بەرهەمهێنانی سەروەت بۆ گشتی، خاڵی سەرەکی و جۆرێکە لە بەرگری و تەنانەت پێشڕەوییەکی گەورە لە بەرامبەر ئەو جەنگە ئابوورییەی دووژمن دەستی پێکردووە".

موجتەبا خامنەیی دەڵێ: "یەکێک لە دەستکەوتەکانی من، بیستنی قسەی خەڵکی ئازیز بووە لە چینە جیاوازەکان، لەوانە لە ماوەیەکی دیاریکراودا، بە شێوەیەکی نەناسراو لەگەڵ ئێوە لەنێو تاکسییەکاندا لە شەقامەکانی تاراندا هاوسەفەر بووم و گوێم لە قسەکانتان گرت، کە ئەم جۆرە نموونەوەرگرتنەم لە زۆر راپرسی بە باشتر دەزانی".

رێبەری کۆماری ئیسلامیی ئێران دەڵێ، تێگەیشتنی ئەو لەگەڵ بۆچوونی خەڵک زۆرجار وەک یەک بوو و لەسەر ئەو بنچینەیەش "هەوڵ دراوە نەخشەیەکی چارەسەری کاریگەر و پسپۆڕانە دابڕێژرێ کە تاوەکو دەکرێت گشتگیر بێت و بەم زووانە لە لایەن بەرپرسانەوە بە هاوکاریی خەڵک جێبەجێ دەکرێت" و ئاماژە بەوەش دەکات کە درووشمی ئەم ساڵ بەناوی  "ئابووریی بەرگری لەژێر سێبەری یەکڕیزیی نیشتمانی و ئاسایشی نیشتمانی" رادەگەیەنم.

رێبەری کۆماری ئیسلامیی ئێران دەگەڕێتەوە بۆ پەیامی یەکەمی لەبارەی پەیوەندی وڵاتەکەی لەگەڵ وڵاتانی دراوسێ و دەڵێ: "ئێمە جگە لە دراوسێیەتی، خاڵی هاوبەشی مەعنەوی و ئایینیمان هەیە. هاوسێ رۆژهەڵاتییەکانی خۆمان زۆر بە نزیک دەزانین. من لەمێژە دەزانم کە پاکستان وڵاتێک بوو کە رێبەرە شەهیدەکەمان خۆشەویستییەکی تایبەتی بۆی هەبوو. لێرەدا داوا دەکەم کە دوو وڵاتی برامان، ئەفغانستان و پاکستان، لەپێناو رەزامەندیی خودا و یەکڕیزیی موسڵمانان، پەیوەندییەکانیان باشتر بکەن و منیش ئامادەی هەر هەنگاوێکم". 

موجتەبا خامنەیی هەروەها دەڵێ: "ئەو هێرشانەی لە تورکیا و عومان (کە پەیوەندییەکی باشمان لەگەڵیان هەیە) ئەنجامدران، بە هیچ شێوەیەک لە لایەن هێزە چەکدارەکانی کۆماری ئیسلامی و بەرەی موقاوەمەوە نەبوون؛ ئەمە تەڵەیەکی رژێمی زایۆنییە بە بەکارهێنانی  بۆ دروستکردنی فیتنە لە نێوان ئێمە و دراوسێکانمان".