عێراقچی: ئێران ئامادەیە رێگە بە کەشتییەکانی ژاپۆن بدات

ئاژانسی هەواڵی (Kyodo)ی ژاپۆنی رۆژی شەممە بڵاویکردەوە، عێراقچی رایگەیاندووە کە گفتوگۆکانیان لەگەڵ ژاپۆن لەسەر ئەم هەنگاوە دەستیپێکردووە.

رۆژی سێشەممەی رابردوو، تۆشیمیتسو مۆتێگی، وەزیری دەرەوەی ژاپۆن لە پەیوەندییەکی تەلەفۆنیدا لەگەڵ عێراقچی، نیگەرانیی قووڵی خۆی دەربڕی لە مانەوەی ژمارەیەکی زۆر کەشتیی پەیوەندیدار بە ژاپۆنەوە لە کەنداو. بەپێی وەزارەتی دەرەوەی ژاپۆن، مۆتێگی داوای لە ئێران کردووە "رێکاری گونجاو بگرێتەبەر بۆ دڵنیابوون لە سەلامەتیی سەرجەم کەشتییەکان لە گەرووی هورمز، لەوانەش کەشتییەکانی ژاپۆن و وڵاتانی دیکەی ئاسیا."

زۆرینەی رەهای نەوتی هاوردەکراوی ژاپۆن بە تەنگەی هورمزدا تێدەپەڕێت، کە ئێستا بەهۆی جەنگی ئەمریکا و ئیسرائیل دژی ئێرانەوە بە شێوەیەکی کردەیی داخراوە.

ئەم پێشهاتە لە کاتێکدایە کە دۆناڵد ترەمپ، سەرۆکی ئەمریکا رۆژی هەینی، واتە رۆژێک دوای لووتکەیەک لەگەڵ سانا تاکایچی، سەرۆکوەزیرانی ژاپۆن، گوتی: "زۆر باش دەبێت ئەگەر ژاپۆن، چین و وڵاتانی دیکە کە پشت بە وزەی رۆژهەڵاتی نێوەڕاست دەبەستن، لە پاراستنی کەشتییەکان لە تەنگەکە بەشدار بن."

لە کۆبوونەوەکەی واشنتندا، تاکایچی توانی خۆی لە دروستبوونی ناکۆکیی ئاشکرا لەگەڵ ترەمپ بپارێزێت و پێدەچێت کەمێک تێگەیشتنی سەرۆکی ئەمریکای بەدەستهێنابێت، بە جۆرێک ترەمپ ستایشی تۆکیۆی کرد کە "هەنگاوی باش دەنێت." بەڵام ترەمپ هێشتا بێزارە لەوەی هاوپەیمانەکانی کەشتیی جەنگی نانێرن بۆ یاوەریکردنی کەشتییە نەوتهەڵگرەکان و پاککردنەوەی گەرووەکە لە مین.

رۆژی هەینی لە کۆشکی سپی، ترەمپ بە رۆژنامەڤانانی گوت: "بە مانۆڕێکی سەربازیی سادە دەکرێت تەنگەکە بکرێتەوە، بەڵام ئەمە پێویستی بە ناردنی ژمارەیەکی زۆر کەشتی هەیە."

ترەمپ رەخنەی لە ناتۆش گرت و گوتی: "کارێکی تا رادەیەک سەلامەتە، بەڵام پێویستیت بە یارمەتی و قەبارەی گەورە هەیە. ناتۆ دەتوانێت یارمەتیمان بدات، بەڵام تا ئێستا بوێرییان نەبووە ئەوە بکەن."

هەروەها جەختی کردەوە: "ئێمە پێویستمان بە تەنگەکە نییە، ئەورووپا، کۆریای باشوور، ژاپۆن، چین و زۆر کەسی دیکە پێویستیان پێیەتی... بۆیە دەبێت ئەوان کەمێک تێوەبگلێن."

سەرۆکوەزیرانی ژاپۆن بە ئاشکرا گوتوویەتی کە هێشتا هیچ بڕیارێک نەدراوە بۆ ناردنی هێزی دەریایی ژاپۆن بۆ تەنگەکە. دوای کۆبوونەوەکەی لەگەڵ ترەمپ، گوتی کە "بە روونی هەڵوێستی ژاپۆنم پێڕاگەیاندووە" لەبارەی ئەو کێشە یاساییانەی رێگرن لە ناردنی هێز، هاوکات جەختی لە پێویستیی "هێورکردنەوەی خێرای دۆخەکە" و رۆڵی تۆکیۆ لە هەر چارەسەرێکی دیپلۆماسیدا کردەوە.