رووداو دیجیتاڵ
بەڕێوەبەری لیژنەی چاودێریی کۆمەڵەی مانگی سووری ئێران رایگەیاند، لە سەرەتای جەنگەوە تاوەکو ئێستا تیمەکانیان توانیویانە زیاتر لە 680 کەس لەژێر داروپەردووی باڵەخانە رووخاوەکاندا رزگار بکەن، نزیکەی نیوەیان منداڵ و مێردمنداڵن.
ئەمیرموحسین زیائی، بەڕێوەبەری لیژنەی چاودێریی کۆمەڵەی مانگی سووری ئێران دەڵێت، تیمەکانیان لە زۆربەی شوێنەکان، بەتایبەت لەو ناوچانەی سڤیلنشینن، بە کەمتر لە پێنج خولەک دەگەنە شوێنی رووداوەکان و دەست بە ئۆپەراسیۆنی گەڕان و رزگارکردن دەکەن.
سەبارەت بە ژمارەی ئەو کەسانەی لە مردن رزگارکراون، زیائی گوتی: "لە سەرەتای جەنگەوە تاوەکو ئێستا، توانراوە زیاتر لە 680 کەس لەژێر داروپەردووی باڵەخانەکان دەربهێندرێن و رزگار بکرێن. لەو ژمارەیەش زیاتر لە 280یان منداڵ و مێردمنداڵی تەمەن خوار 18 ساڵن."
بەڕێوەبەری لیژنەی چاودێریی کۆمەڵەی مانگی سووری ئێران راشیگەیاند ، ئەوەی لە رێگەی تۆڕە کۆمەڵایەتییەکانەوە دەبینرێت تەنیا بەشێکە لە دیمەنەکان و قەبارەی کارەکان و رووداوەکان لەوە گەورەترن کە دەردەکەون.
ئەم لێدوانانەی بەرپرسەکەی مانگی سووری ئێران لە کاتێکدایە، بەهۆی پەرەسەندنی گرژی و پێکدادانەکان لە ناوچەکە، تیمەکانی فریاگوزاری کەوتوونەتە ئامادەباشییەکی تەواوەوە بۆ هاوکاریکردنی زیانلێکەوتووانی جەنگ.
شەڕی ئەمریکا و ئیسرائیل لەگەڵ ئێران نزیکە لە مانگێک، لە سەرەتای شەڕەوە تاوەکو ئێستا چەندین شوێنی سڤیل لە ئێران و ئیسرائیل کراونەتە ئامانج و قوربانی زۆری لێکەوتووەتەوە.