رووداو دیجیتاڵ
بەرەبەیانی ئەمڕۆ چوارشەممە، 1ـی نیسانی 2026، زنجیرەیەک تەقینەوەی بەهێز شاری شیرازیان لە باشووری ئێران هەژاند. بەپێی سەرچاوە خۆجێییەکان، دەنگی تەقینەوەکان هێندە بەهێز بوون، کە بوونەتە هۆی لەرینەوەی باڵەخانەکان و شکانی شووشەی پەنجەرەکان لە چەندین گەڕەکی شارەکەدا.
بەپێی ئەو زانیارییانەی لە تۆڕە کۆمەڵایەتییەکان و لە زاری دانیشتووانی شیرازەوە بڵاوکراونەتەوە، تەقینەوەکان لە کاتژمێر 02:12ـی بەرەبەیانیی ئەمڕۆ دەستیان پێکردووە. شایەتحاڵەکان دەڵێن، دەنگی چەندین تەقینەوەی یەک لە دوای یەکیان لە ناوچەکانی "زرهی"، "فەرهەنگ شەهر" و "تاچارا" بیستووە.
بەشێک لە هاووڵاتیان لە تۆڕە کۆمەڵایەتییەکان ئاماژە بەوە دەکەن، کە هاوکات لەگەڵ تەقینەوەکان، دەنگی فڕۆکەی جەنگی لە ئاسمانی شارەکەدا بیستراوە. یەکێک لە دانیشتووانی ناوچەی تاچارا دەڵێت: "دوو تەقینەوەی زۆر بەهێز بوون، هەموو دەرگا و پەنجەرەکانی ماڵەکەمان لەرزین."
بەپێی زانیارییە سەرەتاییە نافەرمییەکان، وا دەردەکەوێت ناوەندە پیشەسازی و سەربازییەکان کرابنە ئامانج، لەوانە "کۆمەڵگەی پیشەسازییە ئەلیکترۆنییەکانی شیراز (سەساد)" و "پادگانی بەعسەت". هەروەها هەندێک سەرچاوە باس لە هێرشکردنە سەر بنکەیەکی مووشەکی و بەرگریی ئاسمانی لە ناوچەی "قەرەباغ" و "کێوی داراک" دەکەن.
هەندێک لە شایەتحاڵەکان باس لەوە دەکەن کە تەقینەوەکان بەهۆی "موشەک" یان "هێرشی ئاسمانی" بووە، بەڵام تاوەکو ئێستا هیچ سەرچاوەیەکی فەرمی لە ئێران، هۆکاری تەقینەوەکان و قەبارەی زیانەکانی ئاشکرا نەکردووە.
